काठमाडौं । कालापानी, लिपुलेक र लिम्पियाधुरा समेटिएको चुच्चे नक्सालाई एक सय रुपियाँका नोटमा समावेश गर्ने नेपालको निर्णयलाई भारतीय विदेशमन्त्री एस.जयशंकरले नेपालको यो कदमले परिस्थिति र वास्तविकतालाई परिवर्तन नगर्ने बताएका छन् ।

शनिबार भारतको भुवनेश्वरमा सञ्चारकर्मीहरूसँग कुरा गर्दै जयशंकरले भने, ‘हाम्रो अडान एकदम स्पष्ट छ । नेपालसँग हाम्रो सीमाका विषयमा स्थापित मञ्चमार्फत छलफल भइरहेको छ ।’

‘त्यसको बीचमा, तिनीहरूले एकतर्फी रूपमा आफ्नो पक्षमा केही उपायहरू गरे’, जयशंकरले भनेकाे द ईण्डियन एक्प्रेसले उल्लेख गरेको छ ।

प्रचण्ड सरकारको बिहीबार सिंहदरबारमा बसेको मन्त्रिपरिषदको बैठकले नयाँ नोटबारे निर्णय गरेको थियो । नेपाल सरकारकी प्रवक्ता तथा सञ्चारमन्त्री रेखा शर्माले १ सय रुपियाँको नोटमा चुच्चे नक्सा समावेश गर्ने निर्णय गरेको बताएकी थिइन् ।

मन्त्रिपरिषदको निर्णयलाई नेपाल बैंक राष्ट्रमा पठाइनेछ । नयाँ नोट छाप्न एक वर्ष लाग्न सक्छ । राष्ट्र बैंकले गुणस्तरीय नोट छाप्न टेन्डर निकाल्नुपर्नेछ ।

राष्ट्र बैंकका पूर्व गभर्नर तथा राष्ट्रपति रामचन्द्र पौडेलका आर्थिक सल्लाहकार चिरञ्जीवी नेपालले भने, ‘सरकारको यो निर्णय अत्यन्तै अनुपयुक्त समयमा आएको हो र यसको ठूलो असरलाई नचिनेर आएको हो ।’

पूर्वगभर्नर नेपालले भने, ‘केही भू–भागमा भारतसँग नेपालको विवाद हुनु एउटा कुरा हो । तर, दुई छिमेकीलगायत अन्तर्राष्ट्रिय निकायले मान्यता दिएकोभन्दा फरक नक्सा मुद्रामा छाप्नु मूर्खतापूर्ण कुरा हो ।’