काठमाडौं । नेकपा (एमाले)भित्र विचार र निष्ठाको राजनीति गर्दै आएका प्रभावशाली नेता शंकर पोखरेललाई अध्यक्ष केपी ओली र वरिष्ठ नेता माधवकुमार नेपालसहितका नेताहरूको भित्री डिजाइनमा केन्द्रीय राजनीतिबाट पछाडि धकेल्ने षड्यन्त्र भएको छ ।

वाम तालमेल र कथित पार्टी एकीकरणको नाममा स्थायी समितिका सदस्य पोखरेललाई ५ नं. प्रदेशमा थन्काउने प्रयास भएको हो ।

पोखरेललाई एमालेको भावी अध्यक्ष र प्रधानमन्त्रीका रुपमा समेत हेरिएको थियो । अकस्मात गठबन्धनका नाममा पोखरेललाई प्रदेशमा रोक्ने अन्तिम तयारी भएपछि उनका थुप्रै शुभेच्छुकहरूले चित्त दुखाएका छन् ।

दाङ क्षेत्र नं. २ बाट प्रतिनिधि सभाका लागि उम्मेदवारी दिने तयारीका साथ विगत पाँच वर्षदेखि सो क्षेत्रमा संगठन र विकास निर्माणका काम गर्दै आएका पोखरेललाई एमालेका अध्यक्ष ओली र नेकपा (माओवादी केन्द्र) अध्यक्ष पुष्पकमल दाहाल ‘प्रचण्ड’ तथा एमालेका वरिष्ठ नेता नेपाल, उपाध्यक्ष बामदेव गौतमको योजनामा ५ नं. प्रदेशमा रोकिएको उच्च स्रोतको भनाइ छ । पोखरेलसँग उपमहासचिव विष्णु पौडेलसहितका नेताहरू शसंकित थिए ।

एमालेका अध्यक्ष ओलीको राजनीतिक प्रस्ताव र पार्टीका महत्वपूर्ण दस्तावेज लेखनमा जहिले पनि स्थायी समिति सदस्य पोखरेलले ठूलो योगदान दिँदै आएका थिए । दिनप्रति दिन बढ्दै गरेको पोखरेलको लोकप्रियताबाट एमालेभित्रैका केही नेताहरूलाई चित्त बुझेको थिएन ।

‘शंकर पोखरेलले आफूलाई केन्द्रीय राजनीतिमा प्रभाव छाड्ने गरेर अगाडि बढाउनु भएको थियो’, पोखरेल निकट एमालेका एकजना पोलिट व्युरो सदस्यले नाम उल्लेख नगर्ने सर्तमा भने, ‘यसपटक पोखरेलले दाङ क्षेत्र नं. २ बाट जित्ने पक्का थियो ।’

५ नं. प्रदेशको मुख्यमन्त्रीको लोभ पोखरेललाई देखाइएको छ । तर, पोखरेल पद र लाभका पदका लागि महत्व नदिने व्यक्ति हुन् । दाङबाट प्रतिनिधी सभाको निर्वाचनमा पराजित हुँदा समेत पोखरेल कहिल्यै पनि आत्तिएनन् । बरु ईमान्दार कार्यकर्ताको रुपमा काम गर्दै आए ।

रोल्पा जिल्ला घर भई दाङमा बेलाबेला राजनीति गर्दै आएका माओवादी केन्द्रका नेता कृष्णबहादुर महराले पोखरेललाई दाङको २ नं. क्षेत्रबाट आउट गराएका हुन् । पटक पटक मन्त्री भएका र तस्करीको सुनबाट करोडौँ रुपियाँ कमाएका महरालाई २ नं. क्षेत्रमा शरणार्थी नेताको रुपमा चर्चा हुने गरेको छ ।

रोल्पाबाट वर्षमान पुनले टिकट नदिएपछि महरा बाध्य भएर दाङको २ नं. क्षेत्रमा झरेका हुन् । लोभ र लालचको राजनीतिमा अब्बल मानिएका महरा चीनबाट पैसा ओसार्ने नेताका रुपमा परिचित छन् । चीनसँग पैसा मागेको महराको फोन रेकर्ड यसअघि नै सार्वजनिक भइसकेको छ । विवादास्पद छविका महरा भ्रष्टाचारमा गन्हाएका नेताका रुपमा परिचित छन् ।