घर बाहिर ननिस्कन सर्वसाधारणलाई प्रहरीको अपील
काठमाडौं । नेपाल प्रहरीले सर्वसाधारणलाई सकेसम्म घरबाट बाहिर ननिस्कन अपील गरेको छ ।
कोभिड–१९ को संक्रमणको जोखिमलाई मध्यनगर गर्दै प्रहरीले यस्तो अनुरोध गरेको हो ।
सरकारले आइतबारदेखि अत्यावश्यक बाहेकको सेवा बन्द गरेको तथा सोमबारदेखि नाका भएर यात्रुबाहेक सवारीसाधान भित्रन तथा बाहिरिन समेत नदिने निर्णय गरेसँगै प्रहरीले यस्तो अनुरोध गरेको छ ।
सरकारले भारत र चीनसँगको सबै नाका समेत आजैदेखि बन्द गराएको छ ।
२५ जना बढी भिडभाड नगर्न, क्लब, फिल्म हललगायत सञ्चालनमा पनि रोक लगाइएको छ ।
महानगरीय प्रहरी कार्यालयले संक्रमणविरुद्ध अभियान सञ्चालन गर्दै सर्वसाधारणलाई घरबाहिर ननिस्कन आग्रह गरेको छ ।
कार्यालयले ‘हामी तपाईंको सुरक्षार्थ बाहिर छौँ, तपाईं हाम्रो सुरक्षार्थभित्रै बस्नुहोस्’ भन्ने नारा नै तय गरेको छ ।
सरोकारवाला निकायले प्रत्येक सडकचोक, बस्ती तथा टोलमा ‘माइकिङ’ गरी सरसफाइ र कोरोनाको लक्षणका सम्बन्धमा सचेतना फैलाउन समेत थालेका छन् ।
सर्वसाधारण नागरिकमा समस्या देखिए आवश्यक सुविधाका लागि महानगरीय प्रहरीले प्रहरी अस्पतालको एम्बुलेन्स र प्रहरी भ्यान प्रयोग गर्न सक्ने गरी व्यवस्था मिलाइएको छ ।
बिरामीको सुविधाका लागि डोर टु डोर सेवा गरिएको हो ।
फेसबुकबाट तपाईको प्रतिक्रिया