यी हुन् संसारलाई हर्कत देखाएकी नेपाली गायिका
काठमाडौं । त्रिभुवन अन्तर्राष्ट्रिय विमानस्थलमा आफूलाई महिला प्रहरीले अपमानजनक व्यवहार गरेको आरोप लगाउँदै प्रहरीलाई नानाभाँती गाली गर्ने गायिका आस्था राउतमाथि अनुसन्धान हुने भएको छ ।
प्रहरी प्रधान कार्यालयले महानगरीय प्रहरी कार्यालयल रानीपोखरीलाई गायिका राउतमाथि अनुसन्धान गर्न पत्राचार गरेसँगै उनीमाथि अनुसन्धान हुने भएको हो ।
नेपाल प्रहरीका प्रवक्ता प्रहरी नायव महानिरीक्षक (डीआईजी) शैलेश थापा क्षेत्रीले सामाजिक सञ्जालमा पोस्ट गरेको भिडियोको विषयमा छानबिन गर्न निर्देशन दिइएको बताएका छन् ।
गायिका राउतको विषयमा कुरा गर्न महानगरीय प्रहरी कार्यालयल रानीपोखरीका प्रमुख प्रहरी नायव महानिरीक्षक (डीआईजी) विश्वराज पोखरेलसँग सम्पर्क गर्दा आफू कार्यालयको कामले बाहिर भएको हुँदा बुझेर जानकारी गराउने बताए ।
गायिका राउतले प्रहरीले अपमानजनक व्यवहार गरेको भन्दै सामाजिक सञ्जाल फेसबूकमा लाइभ नै गरी प्रहरीमाथि खनिएकी थिएन् ।
गायिका राउतले लाइभ भिडियोमा प्रहरीलाई डन्ठे, प्यूसा, पुलिस हो कि फुलिसजस्ता अपशब्द पटक–पटक प्रयोग गरेकी छन् ।
भ्वाइस अफ नेपाल जस्तो अन्तर्राष्टियस्तरको रियालिटी शोको जज समेत रहेकी गायिका राउतले प्रयोग गरेको शब्दका कारण उनी नै विवादमा तानिएकी हुन् ।
यद्यपि, अहिले भने उनले त्यो भिडियो हटाइसकेकी छिन् । माफी माग्दै अर्को स्टाटस लेखेर प्रहरीले व्यवहार सुधार गर्नुपर्ने बताएकी छिन् ।
‘रिसको आवेगमा बेद पढिँदैन, मलाई पनि त्यस्तै भयो, केही शब्दहरूका लागि क्षमा चाहन्छु । प्रशासनको कामहरुप्रति मलाई सधै सम्मान छ’, उनले भनेकी छिन्, ‘सर्वसाधारणहरूसँग बोल्दा तुच्छ व्यवहार नगरियोस्, तँ तँ र म म गर्न बन्द गरियोस्, नैतिक शिक्षाको कमी नरहोस् ।’
यसअघि गायक समीर घिसिङ ‘भिटेन’ले अश्लीश शब्द प्रयोग गरी गीत गाउँदा महानगरीय अपराध महाशाखाले पक्राउ गरेको थियो ।
उनले माफि मागेपछि भने छाडिएको थियो । अब राउतमाथि चाहि कस्तो कारबाही हुने हो, त्यो भने हेर्न बाँकी छ ।
फेसबुकबाट तपाईको प्रतिक्रिया