काठमाडौं । एमालेका नेताहरूले पार्टी एकीकरणमा विलम्ब गरिरहेका बेला माओवादी केन्द्रका अध्यक्ष पुष्पकमल दाहाल ‘प्रचण्ड’ले केपी ओलीलाई सिधै टेलिफोन गरेर पूर्वसहमति कार्यान्वयनमा दवाव दिएका छन् ।

प्रचण्डले दवाव दिएपछि ओलीले बुधबार भेटेर कुरा गर्ने आश्वासन दिएका छन् । दुई नेताबीचको भेटवार्तापछि एकता संयोजन समितिको बैठक बोलाउने सहमति बनेको छ ।

माओवादीको केन्द्रीय कार्यलयको बैठकमा प्रचण्डले ओलीसँग भएको टेलिफोन संवादवारे जानकारी दिएका थिए । बैठकपछि माओवादी नेता देवेन्द्र पौडेलले ओली र प्रचण्डबीच भएको टेलिफोन सम्वादबारे जानकारी दिए ।

ओली र प्रचण्डबीच एक–दुई दिनभित्र पार्टी एकता संयोजना समितिको वैठक बस्ने सहमति बनेको थियो । तर, त्यसपछि बैठकको मिति तय हुन सकेको छैन । बैठकका लागि एमालेका अध्यक्ष ओलीले नै चासो नदिएको स्रोतको भनाइ छ ।

राजनीतिक कार्यदिशा र शक्ति बाँडफाँडको विषय नेताहरूका लागि सवैभन्दा पेचिलो बनेको छ । यही कारण एमाले–माओवादी पार्टी एकता संयोजन समितिको बैठक पनि बस्न सकेको छैन ।

एमालले अध्यक्ष ओलीलाई नै पार्टी अध्यक्ष र प्रधानमन्त्रीका रुपमा अगाडि सारेको छ । माओवादीले ओली प्रधानमन्त्री भए प्रचण्ड पार्टी अध्यक्ष हुनुपर्ने अडान राखेको छ ।

एमाले र माओवादीले असोज १७ गते चुनावी गठबन्धन घोषणा गर्दा चुनाव लगत्तै एकता प्रक्रिया अगाडि बढाउने बताएका थिए ।

कात्तिक १५ मा बामदेव गौतमको निवासमा एकता संयोजन समितिको बैठकपछि अर्को बैठक बसेको छैन ।

माओवादी प्रवक्ता पम्फा भुसालले एकताबारे आश्चर्यजनक नतिजा आउने बताइन् । ‘एमाले अध्यक्ष ओली कमरेडको स्वास्थ्यमा आएको समस्याले छलफल अलि लम्बिएको हो । पार्टी एकता प्रक्रिया अगाडि जान्छ । पार्टी एकता र सरकार गठनबारे कुनै समस्या छैन । तपार्इंहरूले एकताको आश्चर्यजनक नतिजा पाउनु हुनेछ’, भुसालले भनिन् ।

बैठकले विभिन्न माओवादी धाराबाट आएका नेता कार्यकर्ताको संगठनात्मक व्यवस्थापन गर्न बरिष्ठ नेता रामबहादुर थापाको नेतृत्वमा एउटा कार्यदल गठन गरेको छ । कार्यदलमा नेताहरू टोपबहादुर रायमाझी, गिरिराजमणि पोखरेल, मातृका यादव, शक्ति बस्नेत, लेखराज भट्ट, साबित्रीकुमार काफ्ले, देवेन्द्र पौडेल र सुनिल मानन्धर रहेका छन् ।

बैठकले प्रतिनिधि सभा र प्रदेश सभाको निर्वाचनमा भएको अन्तर्घातको छानविन गर्न नेता अमिक शेरचनको नेतृत्वमा छानविन समिति बनाएको छ । समितिमा लीलामणि पोखरेल, गणेश शाह, हितराज पाण्डे र रेखा शर्मा सदस्य रहेका छन् ।