पोखरा । धमाधम निर्वाचनको तयारी भइरहेका बेला पोखराको सिद्धार्थचोकबाट शुक्रवार साँझ प्रहरीले तीन भारतीय सुटरसहित एक नेपालीलाई पक्राउ गरेको छ ।

सिद्धार्थचोकस्थित एक पसलमा किनमेल गर्दै गरेको बेला उनीहरूलाई प्रहरीले पक्राउ गरेको हो । विभिन्न अपराधमा संग्लग्न भएको सुराकीको आधारमा भारतीय सुटरहरूलाई पक्राउ गरिएको कास्कीका प्रहरी प्रमुख एसपी अशोक सिंहले जानकारी दिए ।

प्रहरीका अनुसार पक्राउ परेका तीन भारतीय हप्ता असुलीदेखि हत्यासम्मका आरोपमा मुद्दा खेपिरहेका व्यक्ति हुन् ।

उनीहरू आधादर्जनभन्दा धेरैै हत्या र दुई दर्जनभन्दा धेरै असुलीका मुद्दाका आरोपित रहेको प्रहरी दाबी छ ।

भारतको राजस्थान प्रहरीले नेपाल प्रहरीको केन्द्रीय अनुसन्धान ब्यूरोलाई उनीहरूको बारेमा जानकारी गराएर खोजी गरिदिन आग्रह गरेपछि नेपाल प्रहरीले ती सुटरहरूको खोजी गर्दै आएको थियो ।

प्रहरीले भारतीय सुटरहरूसँगै एक जना नेपालीलाई पनि पक्राउ गरेको छ । प्रहरीले नेपाली र भारतीय कसैको पनि परिचय खुलाएको छैन ।