मलंगवा । सर्लाही जिल्लामा एसईईको परीक्षा सञ्चालनमा अनियमितता गर्ने ३ जना परीक्षा केन्द्राध्यक्षहरूलाई जिल्ला परीक्षा समन्वय समिति सर्लाहीले कारबाही गरेको छ ।

राष्ट्रिय परीक्षा बोर्ड, परीक्षा नियन्त्रण कार्यालय सानोठिमीले लिएको परीक्षाका क्रममा सर्लाही जिल्लामा अनिर्वाय गणित विषयको परीक्षा सञ्चालन भइरहेका बेला आइतबार निरीक्षण र अनुगमनका क्रममा अनियमितता देखेपछि ३ जना केन्द्राध्यक्षलाई हटाएर नयाँलाई जिम्मेवारी दिइएको छ ।

आइतबार मलंगवामा बसेको समितिको बैठकले श्रीमती लक्ष्मीदेवी जनता माध्यामिक विद्यालय, मलंगवा नगरपालिका– ११ गम्हरियाका केन्द्राध्यक्ष दिनेश रायलाई निलम्बन गरेको जिल्ला प्रहरी कार्यालय सर्लाहीका प्रहरी प्रमुख (एसपी) दयानिधि ज्ञवालीले बताए । जनतामाविको केन्द्राध्यक्षमा बसन्तकुमारप्रसाद साहलाई नियुक्त गरिएको छ ।

श्री जनता माध्यामिक विद्यालय, चक्रघट्टा गाउँपालिका– २ बेल्हीका केन्द्राध्यक्ष वीरेन्द्र चौधरीलाई पनि समितिले निलम्बन गरेर हटाएको छ । जनतामावि चक्रघट्टाको केन्द्राध्यक्षमा रविन्द्र रायलाई नियक्त गरिएको छ ।

श्री जनता माध्यामिक विद्यालय, धनकौल गाउँपालिका वडा नं. ३ हरकठवाका केन्द्राध्यक्ष रामनारायण यादवसहित परीक्षामा खटिएका सबै शिक्षक र कर्मचारीहरूलाई निलम्बनसहित हटाइएको छ । जनतामावि हरकठवाको केन्द्राध्यक्षमा मनोजकुमार रायलाई नियुक्त गरिएको छ ।

समितिले परीक्षामा अनियमिता गर्ने सात जना विद्यार्थीको परीक्षा रद्द गरेर राष्ट्रिय परीक्षा बोर्ड, परीक्षा नियन्त्रण कार्यालयमा जानकारी पठाएको छ । सर्लाहीमा नक्कली परीक्षार्थीलाई पनि कारबाही भएको छ ।

जिल्ला प्रहरी कार्यालय सर्लाहीका प्रहरी प्रमुख (एसपी) दयानिधि ज्ञवालीले एसईई परीक्षाका क्रममा परीक्षा केन्द्रमा अनियमितता भएको पाइएमा कारबाही हुने चेतावनी दिएका छन् ।

उनले कक्षा १० अध्ययन गरेर परीक्षा दिन लागेका विद्यार्थीको भविष्यमाथि कसैले खेलवाड गर्ने कार्य गरेमा तत्काल ठाउँको ठाउँ कारबाही हुने बताए ।

एसपी ज्ञवालीले प्रहरीलाई कडाइका साथ परिचालन गरिएको बताउँदै प्रहरी कर्मचारीबाट कुनै लापरबाही र अनियमितता गरेको थाहा पाउनेवित्तिकै एक्सनमा गएर कारबाही गर्ने चेतावनी दिएका छन् ।