काठमाडौं । नेपाली कांग्रेसले केन्द्रीय कार्यसमितिको बैठक केही दिन पछाडि सारेको छ ।

बुधबार कांग्रेसका मुख्य सचिव कृष्णप्रसाद पौडेलले विज्ञप्ति जारी गरेर पुस २२ गतेको कार्यसमिति बैठक पुस २८ गतेसम्मका लागि स्थगित गरिएको जनाएका छन् । प्रतिनिधि सभाको बैठक २५ गतेदेखि शुरु हुन लागेको छ । सोही कारण केन्द्रीय कार्यसमितिको बैठक पुस २८ गतेका लागि सारिएको हो ।

कांग्रेसले प्रतिनिधि सभाको बैठकमा कसरी प्रस्तुत हुने भनेर पुस २५ गते संसदीय दलको बैठक बोलाएका छ । संसदीय दलको बैठकमा कसरी संसदमा प्रस्तुत हुने भन्ने विषयमा कांग्रेसले रणनीति बनाउनेछ ।

प्रधानमन्त्री पुष्पकमल दाहाल ‘प्रचण्ड’ले पुस २६ गते विश्वासको मत लिने कार्यक्रम छ । कांग्रेसले दाहाललाई विश्वासको मत दिनेछैन ।

‘प्रतिनिधि सभाको अधिवेशन पुस २५ गते प्रारम्भ हुने मिति दृष्टिगत गर्दै नेपाली कांग्रेसको संसदीय दलको बैठक पुस २३ गते संसदीय दलको कार्यालय सिंहदरबारमा १ बजे बस्नेछ’, विज्ञप्तिमा भनिएको छ ।

‘नेपाली कांग्रेस केन्द्रीय कार्यसमितिको पुस २२ गतेका लागि निर्धारित बैठकको मिति परिवर्तन गरेर पुस २८ गते १ बजे बस्ने निश्चित गरिएको छ’, विज्ञप्तिमा उल्लेख छ ।