काठमाडौं । काठमाडौं उपत्यका अपराध अनुसन्धान कार्यालयले चर्चित ज्योतिष रुद्रनाथ अधिकारीलाई पक्राउ गरेको छ ।

प्रहरीले अधिकारीलाई वन्यजन्तुको अखेटोपहरा कारोबारमा संलग्न रहेको अभियोगमा प्रहरीले पक्राउ गरेको विज्ञप्तिमार्फत जनाएको छ ।

प्रहरी टोलीले अधिकारीलाई आइतबार काठमाडौंबाट पक्राउ गरेको जनाएको छ ।

उनीविरुद्ध अदालतले पक्राउ पुर्जी जारी गरेको थियो । सोही पत्रका आधारमा प्रहरीले उनलाई पक्राउ गरेको छ ।

पक्राउपछि अधिकारीलाई डिभिजन वन कार्यालय काठमाडौं पेश गरिएको काठमाडौं उपत्यका अपराध अनुसन्धान कार्यालयका प्रवक्ता एसपी कृष्ण कोइरालाले जानकारी दिएका छन् ।

‘दुर्लभ वन्यजन्तुको अखेटोपहरा कारोबारमा संलग्न भएको अभियोगमा रुद«नाथ अधिकारी पक्राउ परेका छन्’, प्रवक्ता एसपी कोइरालाले भने, ‘थप अनुसन्धानका लागि उनलाई डिभिजन वन कार्यालय पठाइएको छ ।’

डिभिजन वन कार्यालय काठमाडौंको अनुरोधपछि उनीविरुद्ध काठमाडौं जिल्ला अदालतले गत २७ कात्तिकमा पक्राउ पुर्जी जारी गरेको थियो ।

ज्योतिष अधिकारी फरार रहँदै आएका थिए । प्रहरीले गत कात्तिक २१ गते ठमेलस्थित पदमा संग्रौलाले सञ्चालन गरेको होटल ‘हेल्लो हाउस’बाट दुर्लभ वन्यजन्तुको अखेटोपहरा बरामद गरेको थियो ।

घटनमा संलग्न भएको अभियोगमा प्रहरीले संग्रोलालाई त्यही दिन पक्राउ गरेको थियो ।

अधिकारी अहिले प्रहरी हिरासतमा छन् । फसाउने नियतले अखेटोपहरा होटलमा ल्याएर राखेको बयान पक्राउ संग्रौलाले दिएपछि अधिकारीविरुद्ध अदालतले पक्राउ पुर्जी जारी गरेको छ ।

पक्राउ पुर्जी जारी भएलगत्तै वनले पक्राउ गर्न नेपाल प्रहरीको केन्द्रीय अनुसन्धान ब्यूरो (सिआईबी) लगायतका प्रहरी कार्यालयलाई पत्राचार गरेको थियो ।

अधिकारी चर्चित ज्योतिष हुन् । उनले विभिन्न टेलिभिजन तथा युट्यूबमार्फत सर्वसाधरणको कर्म र भाग्य सम्बन्धमा भाविश्यवाणी गर्दै आएका छन् ।