काठमाडौं । पतिबाट पीडित भएको भनिएकी नेहा चौधरीले बबण्डर मच्चाएपछि महोत्तरीमा स्थानीय र प्रहरीबीच झडप भएको छ ।

बिहीबार प्रहरीले स्थितिलाई नियन्त्रणमार राख्न ५ राउन्ड अश्रुग्याँस प्रहार गरेको छ । नेहा चौधरीले अनावश्यक रुपमा महोत्तरीमा बबण्डर मच्चाएर अनुसन्धान र कानून कारबाही प्रक्रियालाई धमिल बनाएको आरोप छ ।

रामगोपालपुर–५ मा स्थानीय र प्रहरीबीच भएको झडपमा परी चार जना घाइते समेत भएका छन् ।

नेहाले पंकज चौधरीको घरमा प्रवेश पाउनुपर्ने माग राख्दै गरिएको आन्दोलनमा आन्दोलनकारीहरूले ढुङ्गामुढा गर्न थालेपछि प्रहरीले हस्तक्षेप गरेको छ ।

झडपमा प्रहरीका अनुसार २ जना सशस्त्र प्रहरी, १ जना नेपाल प्रहरी र १ जना नगर प्रहरी गरी चार जना घाइते भएका छन् ।

मंसिर २६ गते घरेलु हिंसा मुद्दामा जिल्ला अदालत महोत्तरीले संरक्षणात्मक आदेश गरेको थियो ।

माइतबाट घर फर्किएकी नेहाले प्रवेश नपाएको भन्दै सुरु भएको आन्दोलनले उग्ररुप लिएपछि झडप भएको छ ।

नेहा आफ्ना श्रीमान् डा.पंकज चौधरीको घरको गेटमै धर्ना बसेकी थिइन् ।

आन्दोलनलाई नियन्त्रणमा लिन प्रहरीले ५ राउन्ड अश्रुग्याँस प्रहार गरेको जिल्ला प्रहरी कार्यालय महोत्तरीले जनाएको छ ।