काठमाडौं । लुम्बिनी विकास कोषका पदाधिकारी र केही कर्मचारीहरूले लुम्बिनीलाई ‘दुहुनो गाई’ बनाएका छन् ।

कोषका उपाध्यक्ष ‘भिक्षु मैत्रेय’ भनिने अवधेश त्रिपाठी र कोषाध्यक्ष ढुण्डीराज भट्टराई भनिने सिद्धिचरण भट्टराईले कोषलाई आफू खुसी चलाएर नोक्सान पुर्‍याएको आरोप छ ।

उपाध्यक्ष त्रिपाठी र कोषाध्यक्ष भट्टराईले कोषको करोडौं रुपियाँ निजी बैंकहरूमा राखेको खुलासा भएको छ । सेटिङमा पैसा निजी बैंकमा राख्दा आर्थिक लाभ हुने चर्चा कोषभित्र छ ।

कोषको रकम सरकारी बैंकमा राख्नुपर्नेमा उपाध्यक्ष त्रिपाठी र कोषाध्यक्ष भट्टराईले चलखेलका आधारमा निजी बैंकहरूमा करोडौं रुपियाँ राखेका हुन् ।

उपाध्यक्ष त्रिपाठी र कोषाध्यक्ष भट्टराईको जोडीलाई कोषभित्र राम्रो फलिफाप हुँदै आएको चर्चा छ ।

कोषाध्यक्ष भट्टराई र उपाध्यक्ष त्रिपाठीले कोषको करीव दुई करोड सिभिल बैंक भैरहवा शाखामा २ करोड, प्राईम बैंकमा १ करोड, एनएमबी बैंकमा १ करोड, सिद्धार्थ बैंकमा १ करोड, ग्लोबल बैंकमा ५० लाख, एनआईसी एसिया बैंकमा ५० लाख, कृषि विकास बैंकमा ३ करोड ५० लाख, मेगा बैंकमा ३ करोड राखेको उच्च स्रोतले जनाएको छ ।

अरु १/२ वटा निजी बैंकमा पनि कोषको रकम राखेको बुझिएको छ ।

यस विषयमा प्रतिक्रिया लिन उपाध्यक्ष त्रिपाठीसँग सम्पर्क गर्दा सम्पर्क हुन सकेन । उनको फोन अफ थियो ।