काठमाडौं । नेपाली कांग्रेसका डोल्पाका जिल्ला सभापति दीपेन्द्रबहादुर शाहीको लज्जास्पद हार भएको छ ।

निर्वाचन आयोगद्वारा सार्वजनिक अन्तिम नतिजाअनुसार सभापति शाही डोल्पाको प्रदेश सभा २ बाट २२७८ मतको अन्तरमा एमालेसँग पराजित भएका हुन् ।

कांग्रेसका उम्मेदवार ४९ वर्षीय शाहीलाई एमालेका उम्मेदावर ४५ वर्षीय शेरबहादुर बुढाले हराइदिएका हुन् । बुढाले ४७४३ मतसहित विजयी हासिल गरेका छन् ।

कांग्रेसका शाहीले २४६५ मतसहित पराजय भोग्नु परेको छ ।

राजनीतिक पहुँच र पैसाको बलमा प्रदेश सभाको टिकट पाए पनि कांग्रेस सभापति शाहीलाई जनताले हराएर दण्ड दिएका छन् । शाहीले आफ्नै कारण पराजय भोग्नु परेको छ । शाही अहिले पनि भूमिगत शैलीमा छन् ।

लेनदेनको करोडौं रुपियाँ पचाउन सभापति शाहीले आफ्नी पत्नीलाई अभद्र गरेको भनेर आफ्नै नातेदारविरुद्ध समेत उजुरी दिनसम्म पुगेका थिए ।

ठेकेदार पृष्ठभूमिका कांग्रेसका उम्मेदवार शाहीले धेरै व्यक्तिलाई करोडौं रुपियाँ ठगी गरेका छन् ।

शाहीविरुद्ध चेक बाउन्सको अभियोगमा काठमाडौं जिल्ला प्रहरी परिसर टेकुमा उजुरी समेत परेको छ । काठमाडौं प्रहरीले शाहीविरुद्ध काठमाडौं जिल्ला अदालतबाट पक्राउ पुर्जी समेत जारी गरेको छ ।

प्रहरीको सूचीमा फरार रहेका शाहीलाई प्रहरीले डोल्पामा चुनावी प्रचार प्रसारमा सुरक्षा दियो । तर, पक्राउ गरेन । शाहीलाई नेपाली कांग्रेसका उप–सभापति पूर्णबहादुर खड्काको समर्थन र राजनीतिक सुरक्षा छ । सोही कारण शाही बच्दै आएका छन् ।

कांग्रेस डोल्पाका सभापति एवम् प्रदेश सभा सदस्यमा पराजित शाही दुई वर्ष अगाडि दशैंका बेला ठगीको अभियोगमा केही दिन काठमाडौं प्रहरीको कार्यालय टेकुको हिरासतमा समेत बसेका थिए ।

सभापति शाहीले रसुवाको सडकको काममा सन्दीप पाठकसहितका निर्माण व्यवसायीहरूको करीव ५ करोड ठगी गरेको आरोप छ ।

शाहीका कारण सञ्जीव पाठकसहितका निर्माण व्यवसायीहरूले सडकको काम गर्न बैंक र व्यक्तिसँग लिएको पैसा तिर्न नसकेर सडकमा समस्यामा परेका छन् । शाहीलाई रसुवाका बागमती प्रदेश सभाका एक जना पूर्व सदस्यले पनि संरक्षण गर्दै आएका छन् ।

शाहीले धेरै व्यक्तिलाई ठगी गरेपछि विभिन्न सञ्चारमाध्यममा समाचार समेत आएका छन् ।

यसैबीच, प्रदेश सभामा पराजित भएका नारान बुढाले (राष्ट्रिय प्रजातन्त्र पार्टी) १२४ मत पाएका छन् ।

नन्दबहादुर रोकायाले (नेपाल कम्युनिष्ट पार्टी मार्क्सवादी पुष्पलाल) २४ मत पाएका छन् ।