पोखरा । नेपाली कांग्रेसका प्रवक्ता एवम् प्रचार प्रसार समितिका संयोजक डा.प्रकाशशरण महतले सत्तागठबन्धनका उम्मेदवारहरूलाई विजयी बनाउन भूमिका खेल्न निर्देशन दिएका छन् ।

मंगलबार पोखरामा प्रतिनिधि सभा तथा प्रदेश सभा निर्वाचन खेलकुद क्षेत्र समन्वय प्रचार प्रसार उप– समितिको भेटघाट तथा छलफलमा डा.महतले सत्तागठबन्धनका उम्मेदवारहरूले जित्नै पर्ने बताए । उनले संविधान र लोकतन्त्रको रक्षाका लागि कांग्रेससहित सत्तागठबन्धनले जित्नुपर्ने बताए ।

डा.महतले सत्तागठबन्धनका उम्मेदवारहरू पराजित भएमा मुलुकमा पुनः अधिनायकवादको उदय हुन सक्ने जनाएका छन् ।

उपसमितिका संयोजक कर्माछिरिङ शेर्पाले खेलकुद क्षेत्रलाई कांग्रेसले पहिलो पटक भूमिका दिएको भन्दै सत्तागठबन्धनको पक्षमा प्रचार प्रसारमा लाग्न आग्रह गरेका छन् ।

कार्यक्रममा केन्द्रीय सदस्य डिला संग्रौला, गण्डकी कांग्रेसका सभापति शुक्रराज शर्मा, केन्द्रीय सदस्य उमेशजंग रायमाझी, नेतृ सरस्वती गुरुङलगायतको उपस्थिति रहेको थियो ।