काठमाडौं । नेपाली कांग्रेसको समर्थनमा स्वतन्त्रबाट मनोनयन गरेका राजिव गुरुङ ‘दीपक मनाङे’ निर्विरोध भएका छन् ।

कांग्रेस नेतृत्वको गठबन्धनमा रहेका मनाङेले मनाङको प्रदेश सभा निर्वाचन क्षेत्र नं. ‘ख’बाट मनोनयन दर्ता गराएका थिए । उनलाई कांग्रेसको समर्थन थियो ।

२०७४ सालमा मनाङ ‘ख’बाट मनाङे स्वतन्त्रबाट निर्वाचित भएका थिए । यस पटक मनाङेले कांग्रेसको साथ पाएपछि निर्विरोध भएका छन् ।

मंसिर ४ गते हुने प्रदेश र प्रतिनिधि सभा निर्वाचनका लागि २३ गते उनले मनोनयन दर्ता गराएका थिए ।

निर्वाचन अधिकृतको कार्यालयका अनुसार मनाङेसँगै स्वतन्त्रबाट मनोनयन दर्ता गराएका दोर्जे लामा गुरुङले आफ्नो मनोनयन बुधबार फिर्ता लिएपछि मनाङे निर्विरोध भएका छन् ।

मनाङे प्रदेश सभा र प्रतिनिधि सभाको निर्वाचन २०७९ को निर्वाचित हुने पहिलो सांसद बनेका छन् ।

मनाङ कांग्रेसका सभापति शंकर गुरुङले सबैको सहमतिमा मनाङेलाई समर्थन गरिएको बताएका छन् ।

उनले भनेका छन्, ‘हामीले उम्मेदवार उठाएको भए सक्थ्यौं । गठबन्धनको सरकारमा मन्त्री भएको व्यक्तिसँग के चुनाव लडाउनु भनेर अर्को उम्मेदवार उठाएनौँ । दीपक मनाङेले राम्रो काम गरेकै कारण निर्विरोध हुनुभएको छ ।’

मनाङमा प्रतिनिधि सभामा कांग्रेसले केन्द्रीय सदस्य टेकबहादुर गुरुङलाई उम्मेदवार बनाएको छ । टेकबहादुर गुरुङलाई गठबन्धनमा आबद्ध भएका कारण दीपक मनाङेले पनि साथ दिनुपर्नेछ ।