काठमाडौं । निर्वाचन आयोगले प्रधानमन्त्री शेरबहादुर देउवाको उम्मेदवारीविरुद्ध परेको उजुरी खारेज गरिदिएको छ ।

मुख्य निर्वाचन अधिकृतको कार्यालयले देउवाविरुद्धको उजुरी खारेज गरिदिएको हो ।

मतदाता नामावलीमा र नागरिकतामा देउवाको जन्ममिति फरक रहेको भन्दै उजुरी परेको थियो ।

मतदाता परिचयपत्रमा भएको जन्ममितिमा प्रिन्ट मिस्टेक भएको पाइएको डडेल्धुराका मुख्य निर्वाचन अधिकृत बालकृष्ण वाग्लेले बताएका छन् ।

देउवाको नागरिकतामा जन्ममिति ३१ जेठ २००३ छ । मतदाता नामावलीमा जन्ममिति ३१ जेठ २००२ लेखिएको छ ।

जन्ममिति फरक परेको भन्दै वीपी कांग्रेसको तर्फबाट उम्मेदवारी दर्ता गराएका कर्णबहादुर मल्लले सोमबार मुख्य निर्वाचन अधिकृतको कार्यालयमा उजुरी दिएका थिए ।

मंगलबार देउवाको तर्फबाट उनकी पत्नी कांग्रेस केन्द्रीय सदस्य आरजु राणले लिखित जवाफ बुझाएकी थिइन् ।

मुख्य निर्वाचन अधिकृतको कार्यालयले मल्लको उजुरी खारेज गर्दै मतदाता परिचयपत्रमा देउवाका जन्ममिति गलत उल्लेख भएको प्रष्टकरण दिएको छ ।