काठमाडौं । नेपाली कांग्रेस सिन्धुपाल्चोकले केन्द्रीय सदस्य एवम् पूर्वमन्त्री मोहनबहादुर बस्नेतलाई सर्वसम्मत रुपमा प्रतिनिधि सभाको लागि उम्मेदवार बनाउन सिफारिस गरेको छ ।

शनिबार बसेको सिन्धुपाल्चोक कांग्रेसको बैठकले नेता बस्नेतलाई क्षेत्र नं. १ बाट प्रतिनिधि सभातर्फ प्रत्यक्षमा उम्मेदवार बनाउने निर्णय गर्दै केन्द्रीय कार्यसमिति र संसदीय बोर्डमा पत्र पठाएको हो ।

कांग्रेस जिल्ला सभापति जंगबहादुर तामाङले क्षेत्र नं. १ मा नेता बस्नेतलाई नै उम्मेदवार बनाउनुपर्ने अन्यथा सिन्धुपाल्चोकभरि थेग्नै नसक्ने गरि दवाव आउने बताए ।

उनले त्यसको असर निर्वाचनका बेला पूरै जिल्लाभरि पर्ने चेतावनी दिएका छन् ।

नेता बस्नेतलाई उम्मेदवार बनाउन क्षेत्र नं. १ को ‘क’ र ‘ख’ तथा क्षेत्रीय कार्यसमितिले सर्वसम्मत निर्णय गरेर जिल्ला कार्यसमितिमा पठाएको थियो । सो निर्णयलाई जिल्ला कार्यसमितिले पनि सर्वसम्मत रुपबाट निर्णय गरेर केन्द्रमा पठाएको छ ।

कांग्रेसको प्रदेश सभा निर्वाचन क्षेत्र कार्यसमितिले समेत नेता बस्नेतलाई नै टिकट दिनुपर्ने भनेर सर्वसम्मत निर्णय गरेर पठाएका छन् ।

सिन्धुपाल्चोक कांग्रेसले गठबन्धनको नाममा नेता बस्नेतलाई टिकट नदिए कार्यकर्ता निरास हुने र त्यसको प्रत्यक्ष असर चुनावको परिणाममा नकारात्मक हुने चेतावनी दिएको छ ।

गठबन्धनका नाममा सिन्धुपाल्चोकको क्षेत्र नं. १ लाई माओवादी केन्द्रले दाबी गरेको छ । सो क्षेत्रबाट अग्निप्रसाद सापकोटालाई माओवादीले उम्मेदवार बनाउन खोजेको छ ।

५ वर्षको कार्यकालमा सिन्को पनि भाँच्न नसकेका सापकोटालाई जनतालाई खासै रुचाएका छैनन् ।