विराटनगर । नेपाली कांग्रेस विराटनगर महानगर समितिले ५ दलीय गठबन्धनको निर्णयलाई नमान्ने भएको छ ।

गठबन्धनको निर्णयप्रति रुष्ट बनेको नगर कांग्रेसले विराटनगरमा कुनै पनि दलसँग तालमेल नगर्ने जनाएको छ । कांग्रेसले स्थानीय तहको निर्वाचन एक्लै भिड्ने निर्णय यसअघि नै गरिसकेको छ ।

विराटनगरका सभापति दीपक चापागाईंले एक्लै चुनाव लड्ने अडान कायमै रहने बताए । उनले विराटनगरभित्र कुनै दलसँग चुनावी तालमेल नहुने स्पष्ट पारेका छन् ।

यसअघि अरु दलले गठबन्धन गर्दा कांग्रेस एक्लैले चुनाव जितेको र अहिले संगठन झन् मजवुत भएकाले तालमेलको आवश्यकता नरहेको उनको भनाइ छ ।

गठबन्धनको भागबण्डामा उप–मेयर पद जनता समाजवादी पार्टी (जसपा)ले पाएपछि कांग्रेसको महानगर समितिले विरोध गरेको छ ।

मेयरको उम्मेदवारमा महानगर समितिले डिला संग्रौला, अमृत अर्याल, नागेश कोइराला, भीम पराजुली, इन्दिरा कार्की, दीपक चापागार्ई र गोपाल रेग्मीको नाम सिफारिस गरिसकेको छ ।

उप–मेयरको उम्मेदवार सिफारिस हुनेमा निरज कोइराला, झुमा गौतम, प्रमिला गच्छदार, प्रमिला थापा, पुनम सिंह, जस्मिन मण्डल, पंकज बर्मा, दुर्गा कोइराला, डा. सीता घिमिरे, गीता सिलवाल र राजु मास्के छन् ।

विराटनगरको उप–मेयर अर्कैलाई सुम्पिने निर्णय गठबन्धनले गरेको भन्दै सभापति चापागाईंले पार्टीले नगरेको बताएका छन् ।

त्यो निर्णय कांग्रेसको केन्द्रीय कार्य समिति, सम्पादन समिति र संसदीय बोर्डमा आउन बाँकी रहेको उनले बताएका छन् ।

यसअघिको निर्वाचनमा एक्लै चुनाव लडेको कांग्रेस मेयर र उप–मेयर दुवै पदमा विजयी भएको थियो ।

विराटनगरका १९ वडामध्ये ७ वटामा कांग्रेसका उम्मेदवारले जितेका थिए ।