सर्लाही । एमालेका अध्यक्ष खड्गप्रसाद ओलीले आफ्नै पार्टीका नेतालाई एमालेमा प्रवेश गराएका छन् ।

शनिबार सर्लाहीको मलंगवामा एमाले जिल्ला कमिटीले आयोजना गरेको सभामा ओलीले एमालेकै नेता केशव ढुंगानालाई पार्टी प्रवेश गराएका हुन् ।

ओलीले नेता ढुंगानालाई माओवादी केन्द्रको पोलिटब्युरो सदस्यभन्दै एमालेमा प्रवेश गराएका हुन् । ओलीले ढुंगानालाई अबिर र माला लगाइदिएका छन् ।

ढुंगाना दुई कार्यकाल एमालेको सर्लाही जिल्ला कमिटीको सचिव भएका थिए ।

सर्वाेच्च अदालतको फैसलाले एमाले र माओवादी केन्द्र अलग–अलग भएपछि ढुंगाना एमालेमा क्रियाशील भइसकेका थिए ।

एक वर्षअघि नै एमाले बनेका ढुंगानाले यसबीच दर्जनौँपटक ओलीलाई भेटिसकेका छन् ।

शनिबार उनै ढुंगानालाई एमाले अध्यक्ष ओलीले माओवादी केन्द्रका पोलिटब्युरो सदस्य भन्दै पार्टी प्रवेश गराएका हुन् ।

माओवादी केन्द्र सर्लाहीले भने यसलाई एमालेको ‘प्रपोगान्डा राजनीति’ भन्दै व्यंग्य गरेको छ ।