देउवा समूहले ठूलो छाती बनाएपछि सभापतिमा खनालको भाग्य खुल्यो

भरतपुर । नेपाली कांग्रेस चितवनको सभापतिमा राजेश्वर खनाल सर्वसम्मत भएका छन् ।

कोइराला–पौडेल समूहका हुन् खनाल । दोस्रो चरणको प्रतिस्पर्धामा रहेका मिलनबाबु श्रेष्ठले समर्थन गरेका कारण खनाललाई बिना मतदान सभापति घोषणा गरिएको हो । श्रेष्ठ सभापति शेरबहादुर देउवा निकटका हुन् ।

देउवा समूहले दोस्रो चरणको मतदानमा नगइकन ठूलो छाती बनाएर सहयोग गरेपछि खनाल सभापतिमा सर्वसम्मत भएका हुन् ।

चितवन कांग्रेसको सभापति पदका लागि बिहीबार पाँच जनाले मनोनयन दायर गरेका थिए ।

शुक्रबार भएको निर्वाचन परिणाममा कुनै पनि उम्मेवारले ५१ प्रतिशत मत नल्याएपछि दोस्रो चरणको मतदान शनिबारका लागि तय भएको थियो ।

पहिलो चरणमा खनालले ७४६ र श्रेष्ठले ६६२ मत पाएका थिए ।

सभापतिमा उत्तम जोशी, सूर्यकान्त खनाल र कैलाश कोइराला पनि प्रतिस्पर्धामा थिए ।

Published : Saturday, 2022 March 5, 10:11 pm