लमही । दाङको देउखुरीमा यात्रुवाहक बस र अटो एकआपसमा ठोक्किँदा दुई जनाको मृत्यु भएको छ ।

दुर्घटनामा मृत्यु हुनेमा प्यूठानको सरुमारानी गाउँपालिका–५ हातिखाल निवासी ४५ वर्षीया नमसरी बराल र दुई महिनाकी शिशु जेनिसा सोमै मगर रहेको जिल्ला प्रहरी कार्यालय, दाङले जनाएको छ ।

प्यूठानबाट लमही बजार आएर प्यूठानतर्फ फर्किने क्रममा दाङको देउखुरीस्थित लमही नगरपालिका–३ मजगाउँ चोकमा दुर्घटना भएको प्रहरीले जनाएको छ । लमहीबाट भालुवाङतर्फ जाँदै गरेको लु.प्र.०२–००१ ह १५७१ नम्बरको अटो र भालुवाङबाट लमहीतर्फ आउँदै गरेको यात्रु बस एकआपसमा ठोक्किएका थिए ।

प्रहरीका अनुसार पूर्वतर्फ जाँदै गरेको ट्रकलाई उछुनेर अटो अगाडि जान खोज्दा पूर्वबाट तिब्रगतिमा लमहीतर्फ आउँदै गरेको यात्रु बसमा ठोक्किन पुगेको थियो ।

दुर्घटनामा अटो चालक सरुमारानी गाउँपालिका–५ पाखापानीका जीतबहादुर पल्ली मगर, सोही ठाउँकी संगीता सोमै मगर र नौबहिनी गाउँपालिका–८ लुप्लुङका २८ वर्षीय गोपाल अधिकारी घाइते भएको प्रहरीले जनाएको छ ।

घाइते तीन जनाको लमही अस्पतालमा उपचार भइरहेको छ । घटनाबारे प्रहरीले अनुसन्धान शुरु गरेको छ ।