वीरगञ्ज । बंगलादेशमा हिन्दू युवाको भएको हत्याको विरुद्ध जनकपुरधाम र वीरगञ्जमा प्रदर्शन भएको छ ।

महिला अभियानी जनकपुरधामको ब्यानर र नेतृ विभा ठाकुरको नेतृत्वमा शुक्रबार जनकपुरधाममा हिन्दू युवक दीपुचन्द्र दासको हत्याको विरोधमा प्रदर्शन गरिएको हो ।

बंगलादेश सरकार मुर्दावाद, हिन्दू हत्या बन्द गर, दीपुचन्द्र दासको हत्यारालाई फाँसी दे, जमाते इस्लाम मुर्दावाद र रोहिंग्या मुसलमान घुसपैठ बन्द ब्यानरसहित महिला अभियानीहरूले प्रदर्शन गरेका थिए ।

यसैगरी, जमिअत उलेमा ए नेपाल बारा र पर्सा जिल्ला समितिले पनि हत्याविरुद्ध वीरगञ्जमा शनिबार प्रदर्शन गरेको छ ।

जमिअत उलेमा ए नेपालका उपाध्यक्ष मौलाना अलि असगर मदानीको नेतृत्वमा निकालिएको ¥यालीमा मुस्लिम समुदायका अगुवाहरूले प्रदर्शन गरेका छन् ।

हिन्दु युवक दीपुचन्द्र दासको हत्यारालाई फाँसी दे, बंगलादेश सरकार मुर्दावाद, बंगलादेशमा हिन्दूको हत्या बन्द गर, मोहम्मद युनुस मुर्दावाद र हिन्दू मुस्लिम एकता जिन्दावादको नारा लगाइएको थियो ।