काठमाडौं । रौतहटमा २६ वर्षीया रूवीकुमारी साहको हत्या आरोपी लक्ष्मण पासवानको काठमाडौंमा उपचारका क्रममा मृत्यु भएको छ ।

बुधबार बिहान आरोपी पासवानलाई प्रहरीले शरीरमा आगो लगाएको अवस्थामा फेला पारेर उपचारका लागि काठमाडौंको कीर्तिपुर बर्न अस्पताल ल्याएको थियो ।

उपचारका क्रममा बुधबार साँझ ६ बजेतिर पासवानको मृत्यु भएको जिल्ला प्रहरी परिसर काठमाडौंका एसपी अपीलराज बोहराले बताएका छन् ।

आरोपी रौतहटको माधवनारायण नगरपालिका–६ माधवपुरका लक्ष्मण पासवान बिसुनपरवा–मानपुर सडकमा जलेर घाइते भएको अवस्थामा फेला परेका थिए ।

पासवानको एक भिडिओ पनि सार्वजनिक भएको थियो । भिडियोमा पासवानले रूबीको हत्या आफूले गरेको स्वीकार गरेका थिए ।

शनिबार राति साढे ९ बजे रौतहटको गौर नगरपालिका–९ गौर–सिरसिया सडक खण्ड अन्तर्गत मुडवलबा गेट नजिक सडक किनारमा शंकास्पद सुटकेश फेला परेको थियो ।

प्रहरीले सुटकेश खोलेर हेर्दा रौतहटको माधवनारायण नगरपालिका–६ माधवपुर माइती भएकी २६ वर्षीया रूवीकुमारी साहको शव फेला परेको थियो ।