जावलाखेल । नेपाली कांग्रेसका सभापति शेरबहादुर देउवाले संविधान संशोधन गर्दा आदिवासी जनजातिको पहिचान भेटिने र पहिचानका लागि विद्यमान द्वन्द्व मेटिने व्यवस्था मिलाइने बताएका छन् ।

शुक्रबार कांग्रेसको आदिवासी जनजाति विभागद्वारा पार्टी केन्द्रीय कार्यालय, सानेपामा आयोजित कार्यक्रममा देउवाले नेपाली कांग्रेस स्थापना हुनुभन्दा पहिलेदेखि प्रजातन्त्रका लागि आदिवासी जनजाति समुदायका साथीहरूले पार्टीका लागि उल्लेखनीय योगदान दिएको बताए । आदिवासी जनजातिहरूले पार्टी र देशका लागि कठोर संघर्ष गरेको देउवाले बताए ।

‘प्रजातन्त्र स्थापनाको मार्गमा आफ्नो घरपरिवारको प्रवाह नगरी आदिवासी जनजाति समुदायका साथीहरू अगाडि बढ्नुभयो, धेरैले त आफ्नो जीवन नै बलिदान दिनुभयो,’ देउवाले भने, ‘ती सम्पूर्ण प्रजातन्त्र सेनानीप्रति म हार्दिक श्रद्धाञ्जलि अर्पण गर्दछु ।’

सभापति देउवाले भने, ‘उहाँहरूको त्याग, तपस्या र योगदानकै जगमा आज नेपाल लोकतान्त्रिक गणतन्त्रमा प्रवेश गर्न सफल भएको हो ।’

मुलुकका लागि अमूल्य योगदान दिने ती अग्रज योद्धाहरूको योगदानलाई उच्च मूल्याङ्कन गर्दै कांग्रेसले उनीहरूको जीवनीमा आधारित ‘नेपाली कांग्रेसका आदिवासी जनजाति योद्धाहरू’ पुस्तक विमोचन गरेको देउवाले बताए ।

‘पुस्तक विमोचनसँगै उहाँहरूका परिवारलाई सम्मान गर्न पाउँदा मलाई अत्यन्त खुसी लागेको छ,’ सभापति देउवाले भने ।

‘आदिवासी जनजातिलगायत सबै योद्धा तथा नेपाली कांग्रेसका अग्रज नेताहरूले देखाउनुभएको लोकतान्त्रिक र समावेशी मार्गमा पार्टी निरन्तर अग्रसर छ,’ देउवाले भने, ‘उहाँहरूको प्रेरणा र हाम्रो निरन्तर प्रयासका कारण आज पार्टी समावेशी र समानुपातिक मूल्य, मान्यतामा दृढतापूर्वक अगाडि बढेको छ ।’

पार्टीको विधान समावेशी र समानुपातिक स्वरूपमा विकास गरिएको बताउँदै सभापति देउवाले पार्टी संरचनामा आदिवासी जनजाति समुदायको सहभागिता सुनिश्चित गर्न केन्द्रीय समितिमा एक जना सहमहामन्त्री निर्वाचित हुने, कम्तीमा १५ जना केन्द्रीय सदस्यहरू निर्वाचनमार्फत चयन हुने व्यवस्था विधानमार्फत सुनिश्चित गरिएको बताए ।

‘नेपाली कांग्रेसको नेतृत्वमा प्राप्त भएको ऐतिहासिक उपलब्धिहरू गणतन्त्र, संघीयता, धर्म निरपेक्षता, समानुपातिक र समावेशिताको प्रभावकारी कार्यान्वयनमा पार्टी दृढ छ,’ सभापति देउवाले भने ।

सभापति देउवाले पार्टीमा आदिवासी जनजाति विभाग र भ्रातृ संस्थाका रूपमा नेपाल लोकतन्त्रवादी आदिवासी जनजाति महासंघ गठन गरिएको बताए । उनले यी संस्थाहरूका माध्यमबाट आदिवासी जनजातिका पहिचान र प्रतिनिधित्व पार्टीमा बढेको बताए ।

‘आदिवासी जनजातिको सहभागिताबाट पार्टी ठूलो र बलियो बनाउन मद्दत पुगेको छ,’ देउवाले भने, ‘पार्टीको नेतृत्वमा बनेको वर्तमान संविधानमा आदिवासी जनजातिसहित सबै समुदायको आवाजलाई समेट्ने प्रयास गरिएको छ, सबै जातजाति र धर्मावलम्बीलाई सम्मान गर्दै, संविधानमा सबैको समावेशी र न्यायपूर्ण व्यवस्था गरेका छौँ ।’

सबै मिलेर वर्तमान समावेशी संविधानको संरक्षण गर्नु आवश्यक रहेको भन्दै देउवाले संविधान देशको समावेशी र लोकतान्त्रिक भविष्यको आधारका रूपमा रहेको बताए ।

कांग्रेसका उपसभापति पूर्णबहादुर खड्काले नेपालको राजनीति नेपाली कांग्रेसको काँधमा रहेको उल्लेख गर्दै पार्टीको केन्द्रीय कार्यालय र विभागमार्फत निरन्तर क्रियाशील रहने बताए ।

खड्काले पार्टीको कमीकमजोरीलाई सुधारेर जाने सङ्कल्प गरेको बताउँदै नेपाली कांग्रेस निराशा हैन भरोसा बाँड्न तत्पर रहेको बताएका छन् ।

कार्यक्रममा उपसभापति खड्का, महामन्त्री गगन थापा, सहमहामन्त्री भीष्मराज आङ्दम्बे, कोषाध्यक्ष उमेश श्रेष्ठ, केन्द्रीय सदस्यहरू मीनबहादुर विश्वकर्मा, सीता गुरुङ, नैनसिंह महर, कल्याण गुरुङ, गणेश लामा लगायतको उपस्थिति रहेको थियो ।