काठमाडौं । एमालेका अध्यक्ष समेत रहेका प्रधानमन्त्री केपी ओली र नेपाली कांग्रेसका सभापति शेरबहादुर देउवासहितका नेताहरूबीच छलफल भएको छ ।

बिहीबार बालुवाटारमा कांग्रेस र एमालेका शीर्ष नेताहरूबीच पछिल्लो राजनीतिक अवस्थाका विषयमा छलफल भएको हो । कांग्रेससँग एमालेले बागमती प्रदेशमा देखिएको सत्ता समीकरणको विवादका विषयमा चासो राखेको छ ।

कांग्रेसले बागमतीको सत्ता समीकरणको विषय आफूहरूको आन्तरिक विषय भन्दै आफैं मिलाउने जवाफ एमालेलाई दिएको छ । कांग्रेस उपसभापति पूर्णबहादुर खड्काले बागमतीको विवादबारे छलफल भएको बताए । बागमतीको विषय कांग्रेसको आन्तरिक विषय भएको र त्यसमा केही दिनमै निकास दिन्छौं भनेर एमालेलाई जवाफ दिएको उपसभापति खड्काले बताएका छन् ।

बागमती प्रदेशका मुख्यमन्त्री बहादुरसिं लामाले संसदीय दलको नेता पद गुमाएका छन् । बुधबार भएको निर्वाचन प्रक्रियामा लामालाई ईन्द्रबहादुर बानियाँले भारीमतको अन्तरले हराइदिएका छन् ।