चन्द्रपुर । एमालेको भ्रातृ संगठन युवा संघ नेपालले वन मुद्दामा पक्राउ परेका केन्द्रीय सदस्य बिक्रम लामालाई रिहाइको माग गरेर रौतहटमा प्रदर्शन गरेको छ ।

शुक्रबार युवा संघका नेता कार्यकर्ताले पूर्वपश्चिम महेन्द्र राजमार्गको चन्द्रनिगाहपुरमा एक घण्टा अबरोध गरेर आवागमनमा अबरोध पुर्‍याएको छ । वन तस्करी काण्डमा लामा पक्राउ परेका छन् ।

चन्द्रपुर नगरपालिका–२ का लामालाई डिभिजन वन कार्यालयले वनसम्बन्धी मुद्दामा गत बुधबार पक्राउ गरी हिरासतमा राखेको छ । युवा संघका नेता कार्यकर्ताले लामाको विनासर्त रिहाइको माग गरेका छन् ।

डिभिजन वन कार्यालयका प्रमुख शैलेन्द्र मिश्रले लामाविरुद्ध वनसम्बन्धी मुद्दा दर्ता गरी १० दिनको म्याद थपेर हिरासतमा राखेका छन् । युवा संघका नेता कार्यकर्ताले लामालाई छाड्न दवाव दिएका छन् ।

युवा संघका रौतहटका अध्यक्ष मुन्ना यादबको नेतृत्वमा चन्द्रनिगाहपुरस्थित एमालेको पार्टी कार्यालयबाट मोटरसाइकल र्‍याली पनि निकालेका छन् ।

उनीहरूले डिभिजन वन कार्यालय नजिक पुगेर टायर बालेर पूर्वपश्चिम महेन्द्र राजमार्गमा अबरोध गरेका हुन् । डिभिजन वनका प्रमुख मिश्रले भने प्रमाणका आधारमा लामालाई पक्राउ गरी अदालतमा मुद्दा अघि बढाइएको बताएका छन् ।

एमालेको भ्रातृ संगठन युवा संघले सत्ता र शक्तिको आडमा वन मुद्दामा पक्राउ परेका केन्द्रीय सदस्य लामालाई छुटाउन अराजक हर्कत गर्न शुरु गरेको छ । एमाले सत्तामा पुगेको दुई दिनभित्र युवा संघले सडकमा प्रदर्शन गरेर सर्वसाधारणलाई दु:ख दिएको छ ।

गृहमन्त्री रवि लामिछाने छन् । लामिछानेले युवा संघले पूर्वपश्चिम महेन्द्र राजमार्गमा गरेको अबरोधको टुलुटुलु हेरेर बसेका छन् ।