काठमाडौं । नेपाली कांग्रेसले काठमाडौंको तारकेश्वर नगरपालिकाको मेयर र उप–मेयरमा जित हासिल गरेको छ ।

मंगलबार बिहान सार्वजनिक भएको नतिजाअनुसार मेयरका उम्मेदवार कृष्णहरि महर्जन र उप–मेयरकी उम्मेदवार सृजना बुर्लाकोटी विजयी भएको काठमाडौं कांग्रेसले जनाएको छ ।

कांग्रेसबाट मेयरमा उम्मेदवार बनेका महर्जनले ११ हजार ९ सय ८८ मत ल्याएका छन् ।

महर्जनले एमालेका रामेश्वर बोहरालाई पराजित गरेका हुन् । बोहराले सात हजार ८ सय ८ मत ल्याएका छन् ।

कांग्रेसकी उप–मेयरकी उम्मेदवार बुर्लाकोटीले १० हजार सात सय ८६ मत ल्याएर विजयी भएकी हुन् ।

बुर्लाकोटीले एमालेकी भवानी डोटेललाई हराएकी छिन् । डोटेलले आठ हजार ६ मत पाएकी छिन् ।

०७४ मा तारकेश्वर नगरपालिकामा एमालेले मेयर र उप–मेयर जितेको थियो ।

काठमाडौं महानगरपालिकामा कांग्रेस तेस्रो स्थानमा संघर्ष गरिरहेका बेला काठमाडौं जिल्लाकै तारकेश्वर नगरपालिका कांग्रेसले जितेको छ ।

यसअघि कांग्रेसले काठमाडौंकै कीर्तिपुर नगरपालिकामा एमालेको लालकिल्ला भत्काइदिएको छ । कीर्तिपुरमा पहिलो पटक कांग्रेसले जित हातपारेको छ ।

कांग्रेसले कागेश्वरी मनोहरा नगरपालिकामा पनि अग्रता लिइरहेको छ ।