बर्दिया । नेपाली कांग्रेस बर्दियाले पार्टीको नीति विपरित बागी बनेर स्वतन्त्र उम्मेदवारी दिने तथा समर्थक र प्रस्तावकहरूलाई कारबाही गरेर निस्काशन गरेको छ ।

बर्दिया कांग्रेसले सोमबार विज्ञप्ति जारी गरेर बागी उम्मेदवारहरूलाई साधारण सदस्य समेत नरहने गरी ५ वर्षका लागि निष्कासन गरेको हो ।

निष्कासनमा पर्नेहरूमा राजापुर नगरपालिका– १ का लोकराज ढुंगाना, रामप्रसाद धमला, राजापुर नगरपालिका– ७ का रत्नाकार राना तथा राजापुर नगरपालिका– १० का रामकृष्ण चौधरी र नारायणबहादुर शाही रहेका छन् ।

मधुवन नगरपालिका– ३ बाट नारायण मल्ल, शरदकुमार राई, कुलबहादुर बुढा मगर, रामबहादुर मगर, रोइना थारू, प्रसादी थारू र जीतबहादुर थारूलाई पनि बर्दिया कांग्रेसले साधारण सदस्य समेत नरहने गरेर निष्कासन गरेको छ ।

मधुवन नगरपालिका– ३ बाट रामप्यारी चौधरीलाई पनि कांग्रेसले निष्कासन गरेको अनुशासन समिति बर्दियाका संयोजक जगप्रसाद पाण्डेले जनाएका छन् ।

बर्दिया कांग्रेसले कम्युनिस्टलाई फाइदा हुने गरेर पार्टीको नीति विपरितका हर्कत गरेपछि निर्मम तरिकाले कारबाही गरेको छ ।