काठमाडौं । नेकपा (एकीकृत समाजवादी)का अध्यक्ष माधव नेपालले एमालेका अध्यक्ष खड्गप्रसाद ओलीले नेपाललाई सिध्याउन खोजेको तर आफूहरूले बचाएको बताएका छन् ।

शनिबार काठमाडौंमा आयोजित कार्यक्रमलाई सम्बोधन गर्ने क्रममा नेपालले एमसीसीलाई सैन्य रणनीतिको अंग बनाउने कागजमा ओली नेतृत्वको सरकारका मन्त्री प्रदीप ज्ञवालीले हस्ताक्षर गरेको बताए ।

उनले विमस्टेक संयुक्त सैन्य अभ्यासमा नेपाली सेना पनि सहभागी गराउने भनेर ओलीले तयारी गरेको भन्दै आफूहरूको विरोधका कारण त्यो रोकिएको बताए ।

‘केपी ओलीले सिध्याइसकेका थिए नेपाललाई’, उनले भने, ‘केपी आएपछि त सिध्याइदिन्छन् ।’

उनले एमसीसीको सवालमा यथास्थितिमा पास गर्न नसक्ने आफूहरूको स्पष्ट धारणा रहेको बताएका छन् ।

‘एमसीसीको सन्दर्भमा हाम्रो कुरा के हो भने त्यो विशुद्ध आर्थिक सहयोगको परियोजना हुनुपर्दछ’, अध्यक्ष नेपालले भने, ‘यो अनुदान रकमको रुपमा हुनुपर्दछ, वैदेशिक लगानीको रुपमा होइन ।’