हेटौंडा । मकवानपुर जिल्लामा राष्ट्रिय प्रजातन्त्र पार्टी (राप्रपा)का प्रभावशाली नेता रामकृष्ण तिवारी नेपाली कांग्रेसमा प्रवेश गरेका छन् ।

बुधबार हेटौँडामा आयोजित कार्यक्रममा पार्टी पार्टी सभापति एवम् नेपाली कांग्रेस बागमती प्रदेश संसदीय दलका नेता इन्द्रबहादुर बानियाँले तिवारीसहित एमाले र माओवादी केन्द्रका नेताहरूलाई पार्टीमा स्वागत गरेका हुन् ।

नेता बानियाँले कांग्रेसमा सबैलाई स्थान रहेको भन्दै इमान्दारिताका साथ संगठन निर्माणमा लाग्न आग्रह गरेका छन् ।

श्रीकृष्ण प्रणामी सेवा समितिका केन्द्रीय उपाध्यक्षसमेत रहेका तिवारी स्थानीय निर्वाचनमा राप्रपाबाट हेटौंडा उप–महानगरपालिका–१६ मा वडाध्यक्षका उम्मेदवार थिए ।

हेटौंडा उप–महानगरपालिका–११ निवासी एमालेका पुराना नेता कृष्णप्रसाद सापकोटा, हरिप्रसाद सापकोटा, नेत्रप्रसाद ढकाल पनि पार्टी छाडेर कांग्रेसमा प्रवेश गरेका छन् ।

कांग्रेस प्रवेश गर्नेमा माओवादी केन्द्रका हेटौंडा–७ का नेता लीला गौतम पनि रहेको नेता बानियाँका स्वकीय सचिव मिलन पुडासैनीले जानकारी दिएका छन् ।

नवप्रवेशीहरूलाई संसदीय दलका नेता बानियाँ र भौतिक पूर्वाधार विकासमन्त्री कृष्णलाल भँडेलले स्वागत गरेका थिए ।

नेता बानियाँले राप्रपा र कम्युनिष्टहरूको गलत गतिविधिका कारण नेता कार्यकर्तामा वितृष्णा पैदा भएको बताए ।

राप्रपा र कम्युनिस्टहरूको गलत नीतिका कारण कांग्रेसमा प्रवेश गर्ने क्रम बढेको उनले बताएका छन् ।

कांग्रेसमा प्रवेश गरेका सबैलाई उपयुक्त अवसर प्रदान गर्ने नेता बानियाँले बताएका छन् ।

बानियाँले कांग्रेस जनताको समस्या समाधानमा सधैं अग्रसर रहेको बताएका छन् ।

राप्रपाका लोकप्रिय नेता कांग्रेसमा प्रवेश गरेपछि राप्रपाका अध्यक्ष कमल थापा तनाबमा परेका छन् । हेटौँडा अध्यक्ष थापाको गृहनगर पर्छ ।