नेविसंघद्वारा गोरखामा राँके जुलुस प्रदर्शन, ओलीको राजीनामा माग
गोरखा । नेपाल विद्यार्थी संघ (नेविसंघ)ले भारतद्वारा नेपाली सिमाना मिचिएको विरोधमा राँके जुलुस प्रदर्शन गरेको छ ।
नेविसंघले आइतबार साँझ गोरखा बजारमा राँके जुलुस प्रदर्शन गरेको हो ।
लिपुलेकमा नेपाली भूमि अतिक्रमण गरेर सडक निर्माण गरेको विरोधमा नेविसंघले राँके जुलुस प्रदर्शन गरेको नेविसंघका जिल्ला अध्यक्ष सुवास अधिकारीले जानकारी दिएका छन् ।
नेविसंघका नेता तथा कार्यकर्ताहरूले लिपुलेक हाम्रो हो, भारतीय विस्तारवाद मुर्दावाद, नालायक सरकार राजीनामा दे, सीमा मिच्न पाइँदैन जस्ता नारा लगाएका थिए ।
उनीहरूले गोरखा बजारको घ्याम्पेसाल चोकदेखि हरमटारी चोकमा जुलुससहित कोण सभा गरेका थिए ।
संघका अध्यक्ष अधिकारीले भारत सरकारले धार्चुलाबाट लिपुलेकसम्म सडक निर्माण गरेको विषयमा सरकार उदासीन बनेको आरोप लगाएका छन् ।
अध्यक्ष अधिकारीले आफ्नो भूमि मिचिँदासमेत सरकारले पत्तो नपाउनु देश र नेपाली जनताप्रतिको अन्तर्घात भएको बताएका छन् ।
वर्तमान सरकार भष्ट्राचारमा डुबेको, भूमि मिचिँदा मौन बसेको लगायत कारणले राजीनामा दिनुपर्ने माग अध्यक्ष अधिकारीले गरेका छन् ।
फेसबुकबाट तपाईको प्रतिक्रिया