देउखुरी । दाङको देउखुरीस्थित पूर्वपश्चिम महेन्द्र राजमार्गमा भएको सवारी दुर्घटनामा एकजनाको मृत्यु भएको छ ।

शुक्रबार राति साढे दश बजे राप्ती गाउँपालिकाको वडा नं. ५ सिसहनियाँ, दोलैखोलामा पिकअप जीपले मोटरसाइकललाई ठक्कर दिँदा राप्ती गाउँपालिकाको वडा नं. ८ बिजौरी बस्ने २७ वर्षीय सुनिल चौधरीको मृत्यु भएको प्रहरीले जनाएको छ ।

रोल्पाबाट लमहीतर्फ जाँदै गरेको बा १८ च ८६१८ नम्बरको पिकअप जीपले लु ३२ प ७०१४ नम्बरको मोटरसाइकललाई ठक्कर दिएको जिल्ला प्रहरी कार्यालय दाङद्वारा जारी विज्ञप्तिमा उल्लेख छ ।

ठक्करबाट गम्भीर घाइते भएका चौधरीलाई उपचारका लागि लमही अस्पतालमा पठाइएको थियो । चिकित्सकले राति ११ बजे चेकचाजको क्रममा मृत घोषणा गरेका थिए ।

चौधरीको शव पोस्टमार्टमका लािग लमही अस्पतालमा राखिएको छ । पिकअप जीपका चालक रुपन्देहीको सुद्वोधन गाउँपालिका वडा नं. २ बस्ने वर्ष २४ का आशबिन सुनारको दाहिने आँखामा चोट लागेर घाइते भएका छन् ।

सुनारलाई थप उपचारको लागि आँखा अस्पताल भैरहवा रिफर भएको छ । दुबै सवारी साधनलाई ईलाका प्रहरी कार्यालय सिसहनियाले नियन्त्रणमा लिएको छ ।