काठमाडौं । नेपाली कांग्रेसका सभापति शेरबहादुर देउवाले संविधान सभाका अध्यक्ष एवं नेकपा (एमाले) का उपाध्यक्ष सुवासचन्द्र नेम्वाङको भएको आकस्मिक र असामयिक निधनले आफूलाई स्तब्ध बनाएको बताएका छन् ।

मंगलबार शोक वक्तव्य जारी गरेर सभापति देउवाले संघीय लोकतान्त्रिक गणतन्त्र नेपालको संविधान निर्माणका साथै लोकतान्त्रिक आन्दोलनका विभिन्न चरणमा नेम्वाङले पुर्‍याएको महत्वपूर्ण योगदान र सहकार्य सधैं अविस्मरणीय रहने बताएका छन् ।

देउवाले भने, ‘उहाँको अवसानबाट मैले एक असल मित्रलाई गुमाएको छु र मुलुकले नेपालको लोकतान्त्रिक आन्दोलनका एक अनुभवी नेता तथा शीर्ष राजनीतिज्ञलाई गुमाएको छ ।’

‘उहाँको निधनले समन्वय र सहमतीय संस्कृतिको नेपाली राजनीतिक क्षेत्रमा अपूरणीय क्षति पुगेको छ’, देउवाले भने ।

‘यस दु:खद घडीमा उहाँप्रति भावपूर्ण श्रद्धाञ्जलि अर्पण गर्दै दिवंगत आत्माको चीर शान्तिको कामनाका साथ नेकपा (एमाले) पार्टीपंक्ति र उहाँका शोक सन्तप्त परिवारजनप्रति पार्टी र मेरो तर्फबाट गहिरो समवेदना प्रकट गर्दछु’, सभापति देउवाले भने ।