काठमाडौं । सुन तस्करी प्रकरणमा माओवादीका नेता तथा पूर्वउप–राष्ट्रपति नन्दबहादुर पुनका छोरा दीपेश पुनको नाम पनि मुछिएको छ ।

नेपाल प्रहरीको केन्द्रीय अनुसन्धान व्यूरो (सीआइबी)ले दीपेशमाथि अनुसन्धान शुरु गरेको स्रोतले जनाएको छ ।

ठमेलको होटल भियानाका मालिक बेल्जियन नागरिक दावा छिरिङमार्फत तस्करीमा दीपेशको संलग्नताबारे प्रहरीले अनुसन्धान सुरु गरेको जनाएको छ । प्रहरीले दीपेशको संलग्नता हुन सक्ने शंकास्पद कागजात चार दिनअघि फेला पारेको छ ।

पक्राउ परेका चिनियाँ मूलका बेल्जियन नागरिक दावा छिरिङ र तिब्बती मूलका भारतीय नागरिक थुप्तेन छिरिङ लामाको नेपाली र भारतीय सुन कारोबारी तथा नेपाली नेताहरूसँगको सम्बन्धबारे अनुसन्धान सुरु गरेको छ ।

रोल्पाली महिला अमला रोकालाई विवाह गरेका दावाले पूर्व उप–राष्ट्रपति पुनको परिवारसँग सम्बन्ध बढाएको देखिएको छ ।

पूर्वराष्ट्रपति नन्दबहादुर पुन र उनका छोराहरू जितेन्द्र पुन र दीपेश पुन, बुहारी जुना पुनसँग दावाको बारम्बार भेटघाट भएका भिडियोहरू भेटिएका छन् ।

दावाले दीपेशको घरमा पुगेर भेटघाट गरेका छन् । पारिवारिक रूपमा सँगै खाना खाएका तथा विभिन्न स्थानमा घुम्न गएका, तिहारमा भाइटीका लगाएका तस्बिर सार्वजनिक भएका छन् ।

राजस्व अनुसन्धान विभागले साउन ३ मा ६० किलो सुन बरामद गरेपछि र होटल भियानामा छापा मार्नु केही दिनअघि मात्रै अमला रोका पूर्वउप–राष्ट्रपति नन्दबहादुर पुनको घरमा पुगेर खाना खाएको भिडियो सामाजिक सञ्जालमा आएको थियो ।

दावा छिरिङले सुरक्षा निकायलाई पनि चिनियाँ नागरिकबारे सुराकी दिने गरेको पाइएको छ । उनी त्यही आधारमा विगतमा जोगिँदै आएका थिए ।

छिरिङको सम्पर्क माओवादी केन्द्रका उच्च तहका नेताहरू र उनीहरूका परिवारसँग बाक्लो उठबस भएकाले पनि तस्करीका लागि सहज भएको स्रोतले जनाएको छ ।