काठमाडौं । झण्डै एक सय किलो सुन तस्करी प्रकरणमा मुछिएका विवादास्पद व्यापारी राकेश अडुकियाका छोरा रोहन अडुकियालाई त्रिभुवन विमानस्थल अध्यागमनको कार्यालयले रिहा गरेको छ ।

अध्यामगनको हिरासतमा रहेका रोहन शनिबार बिहान १० बजे रिहा भएका हुन् । सुन तस्करी प्रकरणमा उनलाई त्रिभुवन विमानस्थल अध्यागमन कार्यालयले शुक्रबार दिउँसो नियन्त्रणमा लिएको थियो ।

भारतीय नागरिक रोहनलाई सुन तस्करीमा संलग्नताको आशंकामा पक्राउ गरिएको हो । विभागले दुई साताअघि नै अडुकिया बाबुछोरालाई शंकाको सूचीमा राखेर अध्यागमन विभागलाई पत्राचार गरेको थियो ।

नेपालबाट विदेश आउजाउ गरेको रोहनको रेकर्ड अस्वाभाविक रहेको बताइएको छ ।

अध्यागमन विभागले दिएको जानकारीअनुसार उनी १६ महिनामा ४१ पटक नेपाल आएका छन् । उनका बाबु राकेश फरार छन् ।

सुन काण्डको अनुसन्धान गरिरहेको प्रहरीको केन्द्रीय अनुसन्धान व्यूरो (सीआइबी) आफ्नो अनुसन्धानमा रोहनसँगको कनेक्सन नदेखिएको भन्दै जिम्मा लिन नमानेपछि उनी अध्यागमनकै हिरासतमा रहेका थिए ।