काठमाडौं । भारतको श्रावस्ती जिल्लामा भएको सवारी दुर्घटनामा नेपालगञ्जका छ जनाको मृत्यु भएको छ ।

बलरामपुरबाट नेपालगञ्ज आउँदै गरेको युपी ४७ डब्लु १२१७ नम्बरको कार श्रावस्तीको इकौना नजिक सडकमा शनिबार राति सवारी दुर्घटना भएको जिल्ला प्रहरी कार्यालय बाँकेका प्रहरी उपरीक्षक सन्तोषसिंह राठौरले बताए ।

दुर्घटनामा नेपालगञ्ज सदरलाइन निवासी ३५ वर्षीय बैभव गुप्ता, उनकी श्रीमती ३२ वर्षीया दीपिका गुप्ता, तीन वर्षीय छोरा डल्लु गुप्ता र छ महिनाकी छोरी श्रीया गुप्ता छन् ।

नेपालगञ्जकै त्रिभुवनचोकस्थित एस.कुमार वाच कम्पनीका सञ्चालक सन्तोष गुप्ताको छोरा २२ वर्षीय निलान्स गुप्ता र २० वर्षीया छोरी सुनिती गुप्ताको मृत्यु भएको एसपी राठौरले बताए ।

दुर्घटनामा परी गम्भीर घाइते भएका गाडी चालक अजय मिश्रको उपचार भइरहेको छ ।

शनिबार बिहान निलान्स र सुनिती मामाघर घुम्न र बैभव माइतीमा रहेकी श्रीमती दीपिकालाई लिन बलरामपुर पुगेर फर्किने क्रममा दुर्घटना भएको सन्तोष गुप्ताले बताएका छन् ।

मृतकको भारतको बहराइचमा परीक्षणपछि शव नेपाल ल्याउनका लागि आवश्यक प्रक्रियाको तयारी भइरहेको जिल्ला प्रहरी कार्यालय बाँकेका प्रहरी उपरीक्षक राठौरले बताएका छन् ।