काठमाडौं । तारागाउँ विकास समिति रिजेन्सी होटलले पशुपति क्षेत्र विकास कोषको १७ रोपनी जग्गा निकै कम भाडामा प्रयोग गरेको खुलासा भएको छ ।

होटलले १७ रोपनी जग्गा प्रयोग गरेबापत वार्षिक १६ मुरी ८ पाथी ५ माना २ मुट्ठी धानबराबर ४९ हजार २ सय ९८ रुपियाँ दिने गरेको छ ।

मंगलबार राष्ट्रियसभाको राष्ट्रिय सरोकार तथा समन्वय समितिमा कोषका पदाधिकारीले १७ रोपनी भाडामा दिएबापत ४९ हजार पाउने गरेको बताउँदा समिति सदस्यहरू नै आश्चर्यमा परेका छन् ।

समिति सदस्य कुमार दसौदीले भने, ‘१७ रोपनीको १६ मुरी राखिएको रहेछ । काठमाडौंको जग्गा कति महँगो छ । यो १६ मुरीले वर्षभरि १७ रोपनी जग्गा प्रयोग गर्न पाइन्छ भनेर भनिसाध्य भएन ।’

पशुपति विकास कोषका कार्यकारी निर्देशक डा.घनश्याम खतिवडाले भने, ‘बाध्यतामा छौँ । १ रुपियाँ बढायो कि तुरुन्तै जुलुस लिएर आउनुहुन्छ ।’

त्रिभुवन अन्तर्राष्ट्रिय विमानस्थलले पशुपति विकास कोषको ११ सय ६१ रोपनी १४ आना ३ पैसा जग्गा प्रयोग गरेको छ ।

विमानस्थलले जग्गा प्रयोग गरेबापत प्रतिरोपनी १ मुरी ३ पाथीबराबर वार्षिक १ करोड रुपियाँ दिँदै आएको छ ।

मारवाडी सेवा समाजले पशुपतिको जग्गा अतिक्रमण गरेको छ । गाईवस्तुलाई घाँस खुवाउनका लागि सन् १९९७ मा मारवाडी सेवा समाजलाई १ रोपनी २ आना प्रयोग गर्न दिएकोमा हाल अस्पतालदेखि, धर्मशालालगायतका अनेक संरचना बनाएर जग्गा अतिक्रमण गरिरहेको कोषले जनाएको छ ।

जग्गा प्रयोग गरी विभिन्न संरचना निर्माण गरी भाडामा लगाएर मारवाडी सेवा समितिले मोज गरिरहेको छ ।