धनगढी । नेपाली कांग्रेस सुदूरपश्चिम प्रदेश सभाका प्रमुख सचेतक विक्रमसिंह धामीले सभापति शेरबहादुर देउवा तथा नेतृ डा.आरजु राणामाथि आक्रमण हुँदा समेत पार्टीका नेताहरूले आवाज उठाउन नसकेको बताएका छन् ।

मंगलबार बसेको सुदूरपश्चिम प्रदेश सभा बैठकमा धामीले आफ्नै नेतृत्वमाथि कुटपिट हुँदा पनि नेताहरूले त्यसका विरुद्ध आवाज उठाउन नसकेको बताए । उनले भने, ‘मेरो पार्टीका नेता शेरबहादुर देउवा, उहाँको घरमा श्रीमतीसहित आक्रमण भयो, उहाँ घाइते हुनुभयो । उहाँका सम्बन्धमा पनि एक शब्द बोलेनन् । भाउजु भनेर अगाडि–पछाडि लाग्नेहरू कहाँ गए ?’

एमाले अध्यक्ष तथा पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकको पक्राउको पनि उनले विरोध जनाएका छन् । उनले किरियामा भएको बेला पक्राउ गरेर मानवता मारेको बताए ।

सिंहदरबार, सर्वोच्च अदालत, संसददेखि सुदूरपश्चिम प्रदेशका संरचनाहरू जलाइएकोप्रति पनि धामीले विरोध जनाएका छन् ।