काठमाडौं । अन्तरिम सरकारले जेनजी आन्दोलनका क्रममा निधन भएकाहरूलाई शहीद घोषणा गर्दै राष्ट्रिय सम्मानसहित अन्येष्टि गर्ने निर्णय गरेको छ ।

सोमबार सिंहदरबारमा बसेको मन्त्रिपरिषदको बैठकले जेनजी शहीदहरूको सम्झनामा असोज १ गते शोक दिवस मनाउने निर्णय भएको गृहमन्त्री ओमप्रकाश अर्यालले पत्रकारहरूलाई बताएका छन् ।

मृतकका परिवारलाई १५ लाख रुपियाँ दिने निर्णय मन्त्रिपरिषदले गरेको छ । भदौ २३ र २४ गतेको घटनाका सम्बन्धमा छानबिन गर्न उच्चस्तरीय न्यायिक आयोग गठन गर्ने निर्णय भएको अर्यालले बताए । मृत्यु भएकाहरूको सम्मानमा जेन–जी स्मारकसमेत बनाइने मन्त्रिपरिषदले निर्णय गरेको छ ।

गृहमन्त्री अर्यालले भने, ‘मृत्यु भएकाहरूको परिवारलाई प्रतिपरिवार १० लाख क्षतिपूर्ति र अन्य खर्चबापत ५ लाख दिने निर्णय भएको छ । घाइतेहरूको निःशुल्क उपचार गरिनेछ । शव लैजानका लागि निःशुल्क सवारीसाधन र दुर्गमको हकमा हेलिकोप्टरको व्यवस्थापन गर्ने, दाहसंस्कारमा सघाउने निर्णय भएको छ ।’

केपी ओली नेतृत्वको अघिल्लो मन्त्रिपरिषदमा पेस भएका प्रस्तावहरू सम्बन्धित मन्त्रालयमा फिर्ता गर्ने निर्णय भएको गृहमन्त्री अर्यालले बताए ।