नागरिकसँगको विश्वास र साझेदारीमार्फत सेवा प्रवाह गर्न मातहतलाई आईजीपी कार्कीको निर्देशन
काठमाडौं । नेपाल प्रहरीका प्रहरी महानिरीक्षक (आईजीपी) दानबहादुर कार्कीले नागरिकसँगको विश्वास र साझेदारीलाई प्रहरी कार्यको प्राथमिकतामा राख्दै नागरिकमैत्री प्रहरी सेवा दिन निर्देशन दिएका छन् ।
सोमबार नेपाल प्रहरी प्रधान कार्यालय, नक्सालमा सम्पन्न राष्ट्रिय प्रहरी समन्वय तथा समीक्षा बैठक–२०८३ लाई सम्बोधन गर्दै प्रहरी कार्कीले बदलिँदो सुरक्षा चुनौतीको सामना गर्न प्रहरी र नागरिकबीचको विश्वास तथा सहकार्यलाई थप सुदृढ बनाउनुपर्ने बताए । उनले अपराधको प्रवृत्ति र जोखिमको विश्लेषण गरी जोखिमआधारित प्रहरी परिचालन गर्ने तथा प्रमाणमुखी एवं प्रविधिको रणनीतिक उपयोगमा आधारित अपराध अनुसन्धान गर्नुपर्ने बताएका छन् ।
विगतका घटना तथा अनुभवको पुनरावलोकन गर्दै सूचना संकलन र विश्लेषणका आधारमा एकीकृत सुरक्षा योजना बनाई सक्रियताका साथ कार्यसम्पादन गर्नुपर्ने उनले बताएका छन् ।
आईजीपी कार्कीले योग्यता तथा कार्यसम्पादनमा आधारित मानवस्रोत व्यवस्थापन, सुशासन, अनुशासन र आन्तरिक उत्तरदायित्वलाई समेत प्राथमिकतामा राख्न निर्देशन दिएका छन् ।
समीक्षा बैठकमा उठेका विषयलाई छलफलमा मात्र सीमित नराखी उपलब्धिलाई संस्थागत गर्न तथा कमीकमजोरी सुधार गर्दै केन्द्र र प्रदेशबीच कार्यसम्पादनमा एकरूपता कायम गर्नुपर्ने आईजीपी कार्कीले बताएका छन् ।
बैठकमा काठमाडौं उपत्यका प्रहरी कार्यालय, रानीपोखरी तथा सातवटै प्रदेश प्रहरी कार्यालयका प्रमुखहरूले प्रहरी कार्य, अपराध अनुसन्धान, प्रहरी प्रशासन, मानवस्रोत व्यवस्थापन, वर्तमान सुरक्षा चुनौती तथा आगामी कार्ययोजनाबारे प्रस्तुतीकरण गरेका छन् ।
बैठकमा अपराध अनुसन्धानमा प्रविधिको प्रयोग, प्रहरी जनशक्तिको उचित व्यवस्थापन तथा क्षमता अभिवृद्धि, सुरक्षा चुनौतीको सामना र विपद् व्यवस्थापनलगायतका विषयमा छलफल तथा अनुभव आदानप्रदान गरिएको थियो ।
बिचार/ब्लग
देशको राजनीति कठघरामा उभिएको छ : अब निर्मम समीक्षा आवश्यक छ
पं.ज्यो.रुद्रनाथ अधिकारी
फेसबुकबाट तपाईको प्रतिक्रिया