भालुबाङ । दाङको राप्ती गाउँपालिका वडा नं. २, कटाहा, पून्यपुरमा रहेको फोहर व्यवस्थापन केन्द्रमा आगलागी भएको छ ।

आगलागी भएको कटाहा, पून्यपुरमा राप्ती गाउँपालिकाले फोहर व्यवस्थापन गर्दै आएको थियो । जनप्रतिनिधि र कर्मचारीहरूको लापरबाहीले गर्दा फोहर व्यवस्थापन केन्द्रले उचित कार्य गर्न सकेको थिएन ।

पछिल्लो समय फोहर व्यवस्थापनमा स्थानीयहरूले अवरोध गर्दै आएका थिए । स्थानीयको विरोधपछि विवाद भएको थियो । फोहर व्यवस्थापन केन्द्रलाई लिएर स्थानीयले पटक पटक आन्दोलन गर्नुका साथै राप्ती गाउँपालिकाको केन्द्रीय कार्यालयमा समेत घेराउ गरेका थिए ।

राप्ती गाउँपालिकाका अध्यक्ष प्रकाश विष्ट र पदाधिकारी तथा कर्मचारीहरूले व्यवस्थित रुपमा फोहर व्यवस्थापन नगरेको स्थानीयको आरोप रहेका बेला केन्द्रमा आगलागी भएको छ ।

इलाका प्रहरी कार्यालय, भालबाङ्ग, दाङका प्रहरी निरीक्षक पुष्करसिंह ऐरीले फोहर व्यवस्थापन केन्द्रमा लागेको आगो सुरक्षाकर्मी र स्थानीयको पहलमा नियन्त्रणमा लिइएको बताएका छन् । उनले फोहर व्यवस्थापन केन्द्रमा भएको आगलागीको विषयमा अनुसन्धान भइरहेको बताए ।

आगलागीबाट फोहर व्यवस्थापनका लागि बनाइको घर जलेको छ । कसरी आगलागी भयो भन्ने बारेमा अनुसन्धान भएपछि बल्ल कारण पत्ता लाग्ने ईन्स्पेक्टर ऐरीले बताए ।