काठमाडौं । एमालेसँग मिलेर पार्टीको नीति विपरितको गतिविधि गरेपछि राष्ट्रिय प्रजातन्त्र पार्टी (राप्रपा)की मधेश प्रदेश सांसद कञ्चन विच्छा पदमुक्त भएकी छिन् ।

शुक्रबार मधेस प्रदेश सभाले विच्छालाई सांसद पदबाट हटाएको सूचना जारी गरेको छ । महिलातर्फ उनी समानुपातिक प्रदेशसभा सदस्य थिइन् ।

संविधानको धारा १६८ को ३ बमोजिमको ठूलो दलको हैसियतमा एमालेको सरकार बनेपछि विच्छा पार्टीको नीति विपरीत प्रदेश सरकारमा वन तथा वातावरणमन्त्री बनेकी थिइन् ।

अनुशासन उल्लंघन गरेकाले पार्टीको विधान २०४८ (संशोधन सहित) अनुसार ६ महिना साधारण सदस्यबाट निष्कासन गरी विच्छालाई प्रदेश सभा सदस्यबाट फिर्ता गर्ने राप्रपा केन्द्रीय कार्यसम्पादन समितिले निर्णय गरेको थियो ।

बिच्छालाई राप्रपाले तत्काल सरकारबाट बाहिरिन निर्देशन दिए पनि अटेर गरेपछि उनको प्रदेश सभा सदस्य खारेज गर्न प्रदेश सभालाई १२ मंसिरमा पत्राचार समेत गरेको थियो ।