काठमाडौं । नेपाली कांग्रेसका उपसभापति पूर्णबहादुर खड्काले सभापति शेरबहादुर देउवा र केन्द्रीय सदस्य डा.आरजु राणामाथि भएको बर्बतापूर्ण भौतिक आक्रमणको निन्दना एवं भर्त्सना गरेका छन् ।

आइतबार विज्ञप्ति जारी गरेर उपसभापति खड्काले भने, ‘लोकतन्त्रका लागि जीवन पर्यन्त अविचलित रुपमा संघर्ष गरेका पार्टीका आदरणीय सभापति एवं पूर्व प्रधानमन्त्री शेरबहादुर देउवा र पार्टीका केन्द्रीय सदस्य डा. आरजु राणामाथिको अमानवीय र बर्बतापूर्ण भौतिक आक्रमण निन्दनीय एवं भर्त्सना योग्य छ ।’

उपसभापति खड्काले सभापति देउवा र केन्द्रीय सदस्य डा.राणा उपचारको क्रममा रहेको भन्दै शीघ्र स्वास्थ्यलाभको कामना गरेका छन् ।

जेनजीको आन्दोलनको नाममा भदौ २४ गते बुढानिलकण्ठस्थित निवासमा बसिरहेका सभापति देउवा र डा.राणाको ज्यान लिने उद्देश्यका साथ हिंसात्कम आक्रमण भएको थियो । आक्रमणबाट सभापति देउवा र नेतृ डा.राणा गम्भीर घाइते भएका छन् ।

जेनजीको आन्दोलनका क्रममा पार्टीका नेता, कार्यकर्ताहरूमाथि भएको भौतिक आक्रमणको पनि उपसभापति खड्काले निन्दा गरेका छन् ।

‘पार्टीका अग्रजहरू, नेताहरू, पार्टीका साथीहरू तथा अन्य राजनीतिक दलका नेताहरूमाथि भएको भौतिक आक्रमण निन्दनीय र भर्त्सना योग्य छ’, खड्काले भने, ‘उहाँहरू लगायत आन्दोलनका क्रममा घाइते हुनु भएका सबैको शीघ्र स्वास्थ्य लाभको कामना गर्दछौं ।’