काठमाडौं । नेपाली कांग्रेसले वीपीनगर, ललितपुरमा रहेको केन्द्रीय कार्यालय अगाडिपट्टि रहेको १९ आना थप जग्गा खरिद गर्ने सम्झौता गरेको छ ।

कांग्रेसको केन्द्रीय कार्यालय भवन रहेको वीपीनगर, सानेपा, ललितपुरको कार्यालय परिसरलाई अझ फराकिलो र थप व्यवस्थित बनाउने उद्देश्य साथ कार्यालय अगाडिपट्टी रहेको १९ आना (एक रोपनी तीन आना तीन पैसा ) जग्गा र सोही जग्गामा बनेको तीन तले घर खरिद गर्ने निर्णय गरिएको मुख्यसचिव कृष्णप्रसाद पौडेलद्वारा जारी विज्ञप्तिमा उल्लेख छ ।

ललितपुर निवासी अमिरमान अमात्यको नाममा रहेको सो जग्गा र घर नेपाली कांग्रेस केन्द्रीय कार्यालयले खरिद गर्ने गरी २०८२ असार ११ गते महामन्त्रीद्वय गगनकुमार थापा, विश्वप्रकाश शर्मा र कोषाध्यक्ष उमेश श्रेष्ठको उपस्थितिमा जग्गा धनीसँग सम्झौता भएको छ ।

एक वर्षभित्र पास गर्ने गरी ५० लाख रुपियाँ बैनासहित सम्झौता भएको छ । ‘निर्धारित १३ करोड रुपियाँ, पार्टीको विभिन्न तहको लेवि एवं शुभेच्छुकहरूको सहयोग मार्फत सबैको अपनत्व गाँसेर चुक्ता गरिनेछ,’ कांग्रेस केन्द्रीय कार्यालयका मुख्यसचिव पौडेलले बताए ।