काठमाडौं । थाइल्याण्डका लागि नेपाली राजदूतावास, बैंककले म्यानमारबाट सात जना नेपाली नागरिकहरूलाई उद्धार गरेर नेपाल पठाएको छ ।

बुधबार थाइल्याण्डबाट सात जना नेपालीहरूलाई नेपाल फर्काएको बैंककस्थित राजदूतावासले जारी गरेको प्रेस विज्ञप्तिमा उल्लेख छ ।

‘अनलाइन स्क्यामिङ्ग कार्यमा लगाइएका नेपाली नागरिकहरूलाई नेपाली राजदूतावासले थाइल्याण्ड सरकारको सहयोगमा म्यानमारको मेवाडीबाट उद्धार गरी टाक इमिग्रेसन अफिस मेसोट हुँदै थाइल्याण्ड ल्याइ ७ जना पुरुषहरूलाई आज मिति २०८२ असार ११ गतेका दिन नेपाल फर्काइएको छ,’ विज्ञप्तिमा भनिएको छ ।

‘नेपाल सरकारले मापदण्ड बमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो, धेरै पैसा कमाउने हेतु कम्वोडिया, लाओस्, म्यानमार र थाइल्याण्ड लगायत वैदेशिक रोजगारीमा नआउनका लागि राजदूतावास सम्बन्धित सबैमा पुनः अनुरोध गर्दछ,’ विज्ञप्तिमा भनिएको छ ।

परराष्ट्रमन्त्री डा.आरजु राणाले दलालहरूको प्रलोभनमा परेर धेरै नेपाली नागरिकहरूले विदेशमा दुःख पाइरहेको बताउँदै आएकी छिन् । डा.राणाले समस्यामा परेका नेपालीहरूलाई राजदूतावास र नेपाली नियोगहरूमार्फत कुटनैतिक पहल गरी उद्धारमा लाग्न निर्देशन दिँदै आएकी छिन् ।