काठमाडौं । नेपाली कांग्रेसका सांसद समेत रहेका राज्य व्यवस्था तथा सुशासन समितिका सभापति रामहरि खतिवडाले देशभरि पहिरोले बाटो छेके जसरी सरकारले सबै प्रक्रिया अबरुद्ध गरेको भन्दै सरकारलाई पन्छाउन जरुरी रहेको बताएका छन् ।

आइतबार बसेको प्रतिनिधि सभा बैठकमा शून्य समयमा बोल्दै सांसद खतिवडाले प्रधानमन्त्री पुष्पकमल दाहाल ‘प्रचण्ड’को नाम उल्लेख नगरेर नयाँ सरकार बनाउन बाटो नछेक्न आग्रह गरे ।

उनले भने, ‘यो मन्त्री बस्ने सिट भएकोले होला यो ठीक नपारेको सभामुख महोदय । भरखरै देशव्यापी रुपमा आएको बाढी, पहिरोले सडक अबरुद्ध त गरेकै सदन पनि सरकारले पहिरो जस्तै गरेर अबरुद्ध गरिदियो ।’

कांग्रेसका सांसद खतिवडाले बाल्ने क्रममा माइकले काम नगरेपछि व्याङ्ग्य गर्दै सरकारका मन्त्रीहरूको जस्तै माइक पनि रहेको टिप्पणी गरेका हुन् ।

‘यसलाई छिटोभन्दा छिटो पन्छाउने काम देशव्यापरी रुपमा बाढीबाट, पहिरो पन्छाउने काम यथाशीघ्र गरे जस्तै सदनबाट सरकारलाई पन्छाउन काम गर्नुप¥यो । नभए बाटो छेके जस्तो भएको छ’, खतिवडाले भने ।