काठमाडौं । कम्युनिस्टहरूले नयाँ गठबन्धन बनाएर सरकार गठन गरेपछि नेपाली कांग्रेसका सभापति शेरबहादुर देउवाले लोकतान्त्रिक शक्तिहरूसँग भावी रणनीतिलाई लिएर परामर्श गरेका छन् ।

बुधबार आफ्नै निवास बुढानिलकण्ठमा सभापति देउवा लोकतान्त्रिक समाजवादी पार्टीका अध्यक्ष महन्थ ठाकुर, नागरिक उन्मुक्ति पार्टीका अध्यक्ष रेशम चौधरी र जनमत पार्टीका अध्यक्ष डा.सीके राउतसँग छलफल गरेका हुन् । उनीहरूका बीच केन्द्रीय राजनीति, प्रतिनिधिसभा र प्रदेश सरकारहरूको समीकरणका विषयमा छलफल भएको छ ।

बैठकमा कांग्रेसका उप–सभापति पूर्णबहादुर खड्का, महामन्त्री गगनकुमार थापा, नेता शेखर कोइराला, प्रमुख सचेतक रमेश लेखकको सहभागिता रहेका रहेको थियो ।

पछिल्लो राजनीतिक अवस्था र लोकतन्त्र शक्तिलाई बचाएर लोकतन्त्रको रक्षाका लागि कम्युनिस्ट सरकारलाई खबरदारी गर्ने लगायतमा छलफलहरू भएका छन् ।

प्रधानमन्त्री समेत रहेका नेकपा (माओवादी केन्द्र)का अध्यक्ष पुष्पकमल दाहालले तत्कालीन गठबन्धन भत्काएर एमालेसँग कम्युनिस्ट गठबन्धन बनाएपछि केन्द्र र प्रदेश सरकारहरू भत्किएका छन् ।