लन्डन । स्कटल्यान्डको एबरडिन सहरमा आगलागीमा परी २२ वर्षीया आँचल सुवेदी र २४ वर्षीया शिक्षा सुवेदीको मृत्यु भएको छ ।

गत सोमबार एबरडिनको ब्याक हिल्टन रोडमा बस्ने शिक्षा र आँचलको मृत्यु भएको हो । उनीहरु दिदी बहिनी हुन् ।

छिमेकीको तल्लो फ्ल्याटमा आगो लागेपछि दोस्रो तल्लामा रहेका उनीहरु आत्तिँदै भुईंतलामा झर्दा धुँवाको मुस्लोले निस्सासिएर बेहोस भएका थिए ।

एनआरएनए यूके अध्यक्ष प्रेम गाहा मगरले बेहोस भएका शिक्षा र आँचलको घटनास्थलमै मृत्यु भएको बताएका छन् ।

शिक्षा र आँचल पोखरा विश्वविद्यालयका पूर्व प्राध्यापक डा. यज्ञराज सुवेदीका छोरीहरू हुन् । नेपाल पोखरा घर भएका सुवेदी परिवार लामो समयदेखि एबरडिनमा बस्दै आएको छ ।

ज्यान गुमाएका माइली र कान्छी दिदीबहिनी, बाबुआमा र ठूली दिदी तीन बेग्लाबेग्लै फ्ल्याटमा बस्ने गरेको स्कटल्यान्डको सोसल सेक्युरिटी विभागमा कार्यरत कर्मचारी अनल गौतमले जनाए ।