काठमाडौं । प्रतिनिधिसभाको कृषि, सहकारी तथा प्राकृतिक स्रोत समितिले बाँदरको नियन्त्रणबारे अध्ययन गर्न चिकित्सक र सांसदहरूको टोली भारत पठाउन लागेको छ ।

समितिको टोली हिमाञ्चल राज्यमा जानेछ । समितिका सदस्यहरू, १० जना पशु चिकित्सक र ५ जना वनका रेन्जर टोलीमा रहेनछन् ।

समितिकी सभापति डा.आरजु राणा देउवाको पहलमा भारतीय पक्षले नै समितिका सदस्यहरू, १० जना पशु चिकित्सक र ५ जना वनका रेन्जरलाई अध्ययनका लागि बोलाएको हो ।

समितिका अनुसार भारतीय पक्षबाट भ्रमणको मिति तय गर्ने र पठाउने भन्ने भएको छ ।

समितिको बैठकमा बाँदर नियन्त्रणको विषयमा सांसदहरुले आवाज उठाएका थिए । बाँदरका कारण किसानका बाली नष्ट भएको भन्दै नियन्त्रणका लागि राज्यले पहलकदमी लिनुपर्ने उनीहरूको माग थियो ।

बाँदरले गाउँका किसानहरुको बालिनाली खाएर नोक्सानी गरिदिएपछि निकै चिन्ताको विषय बनेको छ । बाँदरबाट हुने नोक्सानी र क्षतिलाई न्यूनीकरण गर्नेबारे भारतसँग जानकारी लिन टोली त्यसतर्फ जान लागेको छ ।