गगनले राखेको पहिलो प्रस्ताव पारित, देउवाले पाए ‘पावरफुल’ अधिकार
काठमाडौं । नेपाली कांग्रेसका सभापति शेरबहादुर देउवाको निर्देशनमा महामन्त्री गगनकुमार थापाद्वारा प्रस्तुत प्रस्ताव पारित भएको छ ।
शनिबार ललितपुरको सानेपामा बसेको केन्द्रीय कार्यसमितिको बैठकमा महामन्त्री थापाले प्रस्ताव पेश गरेका थिए । कांग्रेसको १४औं महाधिवेशनबाट निर्वाचित केन्द्रीय कार्यसमितिको प्रथम बैठकले विभिन्न चार वटा प्रस्ताव पारित गरेको छ ।
कांग्रेसले वीपी कोइरालाको विचार, सुवर्णशम्शेर राणा, गणेशमान सिंह, कृष्णप्रसाद भट्टराई, गिरिजाप्रसाद कोइराला र सुशील कोइराला लगायत अग्रज नेतृत्वको अनवरत संघर्ष र सफल नेतृत्वप्रति उच्च सम्मान व्यक्त गरेको छ ।
‘संघर्ष र सफलताको अनेक चरणमा सहादत प्राप्त गरेका योद्धाहरुप्रति यो बैठक असीम श्रद्धा व्यक्त गर्दछ’, बैठकपछि जारी विज्ञप्तिमा उल्लेख छ ।
‘१४ औं महाधिवेशनमा प्रकट भएको उत्साह, एकता र रुपान्तरणको गहिरो भावना आत्मसात गर्दै इतिहासले सुम्पिएको जिम्मेवारीलाई एकताबद्ध ढंगले सम्पादन गर्ने संकल्प र दृढता यो प्रथम बैठक व्यक्त गर्दछ’, विज्ञप्तिमा उल्लेख छ ।
‘नेपाली कांग्रेसको चौधौं महाधिवेशनलाई सफलतापूर्वक सम्पन्न गरेकोमा निवर्तमान केन्द्रीय कार्यसमितिलाई यो बैठक धन्यवाद ज्ञापन गर्दछ’, कांग्रेसले भनेको छ ।
‘महाधिवेशन तयारी मूल समिति, अर्थ संकलन समिति, भोजन तथा आवास व्यवस्थापन समिति, स्वदेशी तथा विदेशी पाहुना स्वागत तथा व्यवस्थापन समिति, प्रचार प्रसार समिति, उद्घाटन समारोह तथा मञ्च व्यवस्थापन समिति, स्वास्थ्य समिति, सांस्कृतिक समिति र स्वयंसेवक व्यवस्थापन समितिलाई कांग्रेसले धन्यावाद दिएको छ ।
‘शुभकामना सन्देश पठाउनु हुने विभिन्न मुलुकका विभिन्न राजनीतिक दलका प्रमुखहरूप्रति पनि यो बैठक हार्दिक धन्यवाद प्रकट गर्दछ’, कांग्रेसले भनेको छ ।
‘देशभरिको क्रियाशील सदस्यताको छानविन गरी नवीकरण गर्ने र नयाँ सदस्यता प्रदान गर्ने कार्यको टुंगो लगाउन गठित केन्द्रीय क्रियाशील सदस्यता छानवीन समितिलाई धन्यवाद ज्ञापन गर्दछ’, विज्ञप्तिमा उल्लेख छ ।
‘वडा तहदेखि केन्द्रसम्म पार्टीको संगठनात्मक संरचनाको निर्वाचन सम्पन्न गराउन महत्वपूर्ण जिम्मेवारी सम्पादन गरेकोमा केन्द्रीय निर्वाचन समिति र देशभर खटिनु भएका केन्द्रीय निर्वाचन समितिका प्रतिनिधि साथीहरूप्रति यो बैठक धन्यवाद प्रकट गर्दछ’, कांग्रेसद्वारा विज्ञप्तिमा उल्लेख छ ।
‘पार्टीको स्थानीय वडा अधिवेशनदेखि केन्द्रीय महाधिवेशनसम्म निरन्तर सहयोग पु¥याई यो अभियानलाई सफल बनाउन महत्वपूर्ण भूमिका निर्वाह गर्नु भएका सबै सुरक्षा निकाय, स्थानीय तहदेखि केन्द्रीय महाधिवेशनलाई अत्यन्त महत्वका साथ निरन्तर प्रसारण र प्रकाशन गरी आम श्रोता तथा पाठकहरूलाई सुसूचित बनाउन अहोरात्र खट्नु हुने स्वदेशी तथा विदेशी सवै संचार माध्यमप्रति यो बैठक हार्दिक धन्यवाद प्रकट गर्दछ’, विज्ञप्तिमा उल्लेख छ ।
‘पार्टीको स्थानीय वडा तहदेखि केन्द्रीय महाधिवेशनसम्म अनवरत रुपमा अहोरात्र सक्रिय रही पार्टीलाई नयाँ जीवन र गतिशिलता दिनमा अतुलनीय योगदान पुर्याउनु हुने स्वदेश भित्र र विदेशमा समेत रहनु भएका नेपाली कांग्रेसको आधारस्तम्भ सम्पूर्ण क्रियाशील सदस्य, क्षेत्रीय प्रतिनिधिहरू, प्रदेश अधिवेशन प्रतिनिधिहरु, महाधिवेशन प्रतिनिधिहरू एवं विभिन्न तहको नेतृत्व, पदाधिकारी र सदस्य साथीहरूप्रति पनि यो बैठक सम्मान, बधाई र धन्यवाद प्रकट गर्दछ’, कांग्रेसले भनेको छ ।
कांग्रेसले माघ १२ गते हुने राष्ट्रिय सभा सदस्य निर्वाचनमा पार्टीका तर्फबाट खडा गरिने उम्मेदवारलाई दलको औपचारिक पत्र प्रदान गर्नका लागि पार्टी सभापति शेरबहादुर देउवालाई जिम्मेवारी प्रदान गर्ने निर्णय गरेको छ ।
‘माघ १२ गते हुने राष्ट्रिय सभा सदस्य पदको निर्वाचन प्रयोजनका लागि नेपालको संविधानको धारा २७१ तथा राजनीतिक दल सम्बन्धी ऐन २०७३ को दफा ४८ बमोजिम निर्वाचन आयोगमा दल दर्ता गर्ने र सो सम्बन्धी सम्पूर्ण प्रक्रिया पूरा गर्न नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेललाई जिम्मेवारी प्रदान गर्ने निर्णय भएको छ’, विज्ञप्तिमा उल्लेख छ ।
फेसबुकबाट तपाईको प्रतिक्रिया