धेरै भोट भएको यो प्रदेशमा शेखर–विमलेन्द्र–प्रकाशमानको पत्तासाफ, उम्मेदवार नै पाएनन्
काठमाडौं । नेपाली कांग्रेसको सभापतिका उम्मेदवार बनेका शेखर कोइराला, विमलेन्द्र निधि र प्रकाशमान सिंहले प्रदेश नं. २ मा उम्मेदवार नै नपाएको खुलासा भएको छ ।
प्रदेश नं. २ तर्फको केन्द्रीय सदस्य पदमा कोइराला, निधि र सिंहले केन्द्रीय सदस्य पदमा उम्मेदवार बन्ने नेता नै नपाएपछि सभापतिका उम्मेदवार शेरबहादुर देउवा समूह निर्विरोध बनेको छ । केन्द्रीय सदस्यमा मनोनयन दिएका तीन जना नेताहरू आनन्दप्रसाद ढुंगाना, रमेश रिजाल र जंगीलाल राय सभापति देउवा निकटका हुन् ।
सभापति देउवाले तीन जना नेताहरूलाई बोलाएर मिलेर जान अनुरोध गरेपछि जंगीलाल रायले आइतबार बिहान उम्मेदवारी फिर्ता लिएका थिए । रायले उम्मेदवारी फिर्ता लिनेवित्तिकै देउवा प्यानलका ढुंगाना र रिजाल सर्वसम्मत भएका हुन् ।
प्रदेश नं. २ कांग्रेसको उर्वर भूमि ‘मुटु’ मानिन्छन् । प्रदेश नं. २ बाट निधिले सभापतिमा उम्मेदवारी दिएका छन् । सभापतिमा उम्मेदवार बनेका निधिले नै केन्द्रीय सदस्य पदको उम्मेदवार पाएनन् ।
ठूलो तामझाम गरिरहेका सभापतिका उम्मेदवार शेखर कोइरालाले समेत प्रदेश नं. २ मा केन्द्रीय सदस्य पदमा उम्मेदवार पाएनन् ।
कोइरालाले प्रदेश नं. २ मा अमरेशकुमार सिंहलाई उम्मेदवार बनाउने योजनामा थिए । सर्लाहीको क्षेत्रीय अधिवेशनमा सिंह महाधिवेशन प्रतिनिधिमा पराजित भएका थिए ।
सभापतिका अर्का उम्मेदवार सिंहले पनि ठूला कुरा गर्दै आएका थिए । सिंहले पनि प्रदेश नं. २ मा उम्मेदवार नै पाएनन् ।
फेसबुकबाट तपाईको प्रतिक्रिया